Sa U.S.A may unemployment benefits

Nakurat ang dul-an upat ka milyon ka mga nawad-an og trabaho didto sa Amerika sa kalit nga pagkaputol sa pagdawat nila og binuwan nga tseke sa gitawag og "unemployment benefits" nga gihatag kanila sa gobyerno.

Kini tungod sa paglapad karon sa ilang ekonomikanhong krisis nga misangko sa pagpanak-op sa mga dagko ug gagmay’ng trabahoan sa maong nasud.

Nasud-ong sa mga lider sa Amerika nga labing makapabangkarota sa ilang panudlanan kun magpunay sila sa pagtunol og binuwang hinabang sa ilang mga molupyo nga nawad-an og trabaho.

Hinungdan nga kalit nila kining gihunong ug wa nay klaro kun ila ba kining ibalik sa pagpatuman   kay ang ilang mga magbabalaod mao nay mihukom nga wa nay kapuslanan nga magpadayon sila sa paghatag hinabang pinansyal sa mga wa nay trabaho kinsa wala nay klaro kun makatrabaho pa ba sila    pagbalik.

Makaingon ta nga kaanindot diay kaniadto   sa sistema sa panggobyerno didto sa Amerika kay ang mga nawad-an og trabaho gumikan sa pagpanira sa mga gitrabahoang kompaniya gihatagan    og tseke matag buwan sa gobyerno silbing sustento kanila   samtang magpaabot nga makatrabaho sila pag-usab.

Itandi dinhi sa nasud, wa man makatilaw ang mga Filipino niini. Ang gobyerno dinhi way laing bisyo kundi ang pagpaningil og buhis sa katawhan ilabi na kun may trabaho ka.

Di ka makaikyas sa imong bayronon sa buhis matag buwan kay una nimo kobraha ang imong suhol, gisiguro na sa gobyerno ang imong buhis bahala na og halos wa na kay makobra gumikan sa kadaghan sa uban pa nimong bayranan.

Apan inigkatangtang nimo sa trabaho, bahala ka kun unsay mahitabo kanimo ug sa imong pamilya, wa nay gobyerno nga magtagad pa kanimo sa paghatag og hinabang.

Kini tungod kay kabus kaayo ang atong nasud. Apan luyo ning tanan, gusto pa ang    gobyerno nga mosundog kita sa mga adunahang nasud nga himoong 12 ngadto sa 13 ka tuig ang sistema sa edukasyon.

Di kaha kini labing makapabuktot sa mga kabus nga ginikanan   sa ginastohay una makapalampos og kurso sa ilang anak? Di ba?