Kaniadtong Domingo 6,200 ka mga kandidato sa pagka abogado ang nag abot sa 400 anyos nga University of Santo Tomas aron kuhaon ang lisensiya sa pagka abogado. Apan dili basta-basta ang pagkuha sa maong lisensiya ug nasayod na mo kun ngano.
Sigun sa korte suprema adunay 6,210 ka mga kandidato sa pagka abogado kining Nobiyembre 2011 nga Bar examination apan 6,200 lamang ang nakakuha tungod kay ang lima na-disqualified samtang ang laing lima wala modayon.
Ning higayona ang Bar examination gipahigayon sa University of Santo Tomas ug una usab kining higayon nga gihimong multiple choice ang 60 porsiyento sa nahisgutang examination. Ang 40 porsiyento sa examination gipabiling written ug kini gigahin sa paghimo og memorandum sa kaso ug paghatag og legal opinion.
Kun sa nangaging Bar examination tagduha lang ka subject ang i-exam matag Domingo karon dili na. Segun sa eskedyul sa eksaminasyon, sa unang Domingo tulo ka subject ang naka eskedyul ug kini mao ang Political Law ug Labor Law sa buntag ug Taxation sa hapon. Sa ikaduhang Domingo gika eskedyul ang Civil Law sa buntag ug Mercantile Law sa hapon. Gi-eskedyul usab sa ikatulong Domingo ang Remedial Law ug Legal Ethics sa buntag samtang sa pagka hapon ang Criminal Law. Samtang sa ika upat nga Domingo gi-eskedyul ang Memorandum writing sa pagka buntag ug ang Legal opinion nianang pagka hapon.
Ang buwan sa eksaminasyon giusab usab sa korte suprema, gikan sa Septyembre giusab kini sa buwan sa Nobyembre.
Gisuwayan sa labaw’ng hukmanan ning higayona ang multiple choice seguro sa pagtoo nga ang nahisgutang klase sa eksaminasyon mao gayod ang tinuod nga sukdanan sa kahibawo sa kandidato sa pagka abogado. Gawas niini aduna pa seguro usab silay laing rason ug labing seguro apil na niini ang seguridad sa mga examinees.
Ang umaabot nga Bar examination nakadepende sa resulta niining maong Bar examination kay murag ang korte suprema nag eksperimento pa.