Makahuloganong pagtrabaho

Ginaingon nga ang trabaho ug pagpamuhat maoy usa ka paagi sa pagpadayag sa kaugalingong pagkatawo. Ang resulta sa usa ka trabaho maoy salamin kun unsa ang atong gihunahuna ug gibati. Kaanindot gyud unta kun kita motrabaho gumikan kay gusto ug gikalipay nato nga buhaton.

Si Sigmund Freud ang nihatag og gibug-aton sa duha ka foundational needs natong mga tawo. Ang The Need to Love ug ang The Need to Work. Kasagaran atong gihatagan og gibug-aton ang nahiuna ug usahay wala nato matagad ang ikaduha. Managsama silang mahinungdanon sa atong kinabuhi. Kaniadto ang mga tawo nabuhi sa atong gitawag og gift economy. Kini nagpasabot nga nihimo kita og pagbinayloay sa produkto sibo sa atong panginahanglan. Ang bugas ilisan og bino o ang bisti ilisan og harina.

Apan sa dihang nahimong sukaranan ang salapi ang tanan produkto ug serbisyo ang mahimong bayloan og salapi. Ug ang salapi maoy gihimong sukdanan sa bahandi. Mao nga ang tawo mangita og trabaho nga makahatag kaniya og daghang salapi bisan pa man kun kini wala magkahulogan og katagbawan o kaha kalipay. Ang mahinungdanon, salapi. Bahala’g walay kalipay basta dunay kuwarta. Kini mao ang gitawag nato og moniterised enterprise.

Tinuod kitang tanan nagkinahanglan gayud og kuwarta aron kita mabuhi. Apan daghan kanato ang bisan nakahupot niini ang nangahimong kabahin sa sistemang naumol ug naglihok segun sa kantidad. Nawala ang atong pagkatawo ug ang pagpadayag sa atong pagkatawo. Ang pagtrabaho maoy pagpakita sa atong “creativity” ang pagtrabaho maoy paagi sa atong pagkahimugso ingon nga mga linalang nga maantigong mogamit sa atong mga imahinasyon. Ikaw nagmalipayon ba o nakakita og kahulogan sa imong gibuhat karon?