Lisura g'yud uy!

Isip news reporter nga nadistino sa Cebu City Hall, daghan ang nangutana kanako kun posible ba nga makolekta ni Mayor Michael Rama ang gisugyot niya nga budget alang sa 2012 nga moabut og P1.8 bilyones. Buyno, klaro-klaro lang mora’g tan-aw nako maglisud si Rama sa pagkab-ot sa gipangandoy niya nga revenue bisan pa og mamaligya siya’g yuta sa South Road Properties.

Si kanhi mayor ug karon Kongresista Tomas R. Osmeña paspas man g’yud mamaligya og yuta apan atul sa iyang termino nakabaligya lang kini og napulo ka hektareya nga yuta sa Filinvest Land Inc. sa kantidad nga P1.5 bilyones.

Nakabaligya usab si Tommy og 30.4 hektareya nga yuta sa SRP ngadto sa SM Prime Holdings Corporation sa kantidad nga P2.7 bilyones. Sa ato pa mikita lang og P4.2 bilyones nga halin, data-data pa man gani ang bayad.

Ang nakalisud nga makabaligya og yuta si Rama kay mora’g dili mosugot ang kadaghanan sa mga sakop sa Cebu City Council nga nagpabiling alalay ni Osmeña.

Kun koleksyon ra sa buhis ang saligan, bisan og iapil pa ang madawat nga Internal Revenue Allotment (IRA) sa dakbayan gikan sa nasudnong kagamhanan, tan-aw nako mora’g maglisud gani tingali nga makakuha og P6 bilyones.

Usa ra g’yud ang nakaingon niini ug mao ang politika. Kun kauban pa sila si Rama ug ang mga sakop sa konseho, wala unta’y problema.

Apan suporta ko sa pagpagahin ni Rama og dakung pundo alang sa pag-atiman sa kahimtang sa atong panglawas. Iampo lang g’yud nato nga moabut pa ang higayon nga mahiusa ang atong mga opisyal.

* * *

Sa ako hinoong pagtimbang-timbang, makaayo usab kanato kun dili kauban ang mayor ug ang mga sakop sa konseho. Abi ninyo og ngano? Dunay check and balance sa mga isyu ilabi na ang mga naglambigit og dagkung kantidad sa salapi.

Kay maisip man karon nga duna na’y oposisyon sa mga sakop sa konseho, mogawas na sa media ang mga isyu. Sa ato pa, makaayo kini kay kitang mga yano ra nga lumulopyo masayud na man g’yud unsay tinuod.

Anaa diha mosulod ang kaakohan sa mga sakop sa media nga maoy mangita’g paagi nga mahibaw-an sa katawhan ang mga inpormasyon nga gusto nila nga masayran.

* * *

Awhagon nato ang Goldfin Construction nga paspasan nila ang pag-ayo sa naguba nga karsada nga nagdugtong sa Guadalupe ug Kalunasan lagbas sa lapad ug lawom nga Guadalupe River.

Unya mas maayong magahinan og budget ang pagpanindot sa karsada nga gikan sa V. Rama Avenue, Guadalupe ngadto na sa Singson Village kay miagi ko niini kaniadtong miaging gabii ug kagahapon sa buntag, bati kaayo.

Makatabang g’yud uy nga mapadali ang imong biyahe kun gikan ka sa Guadalupe ug adto ka sa Lahug kay mahimo man nga dili ka na moagi sa Escario atubangan sa Capitol.

Anaa na man ang taytayan nga nagdugtong sa duha ka barangay ug ang kuwang niini mao na lang ang pag-ayo sa karsada nga midahili daplin sa sapa. Pwerte ra ba’ng lawma sa sapa busa angay’ng lig-onon g’yud ang riprapping.

* * *

Ang dalan M. Velez pwerteng hoota g’yud sa mga sakyanan kay unsaon, wala mapugos sa Department of Public Works and Highway (DPWH) sa pagpahawa kadtong mga nabayran na nga mga tag-iya’g balay.

Awhagon nato si DPWH district engineer Nicomedes Leonor nga paspasan niya’g maayo aron mahuman pagdali ang proyekto.