Pagpakabana (kuno) sa kalikupan

Daghan na kaayong kalihukan sa mga environmentalist aron pagpanalipod sa atong kalikupan. Kadaghanan niini mao ang pagprotesta nila sa mga coal-fired power plant ingon man ang pagbantay sa kahimtang sa mga landfill kon labayanan sa mga basura.

Apan dili ako makasabut niining gitawag nila og road revolution. Samtang moingon sila nga mawala ang air pollution sa dalan nga dili nila paagian og mga sakyanan ang ubang mga dalan mograbe ang polusyon kay maglisud na man pag-irog ang mga sakyanan tungod sa grabeng trapik. Kalas pa gayud sa gasolina ang maong paagi. Uyon hinoon ako niining ilang urban vegetable gardening diin mananum sila og mga utanon sa kilid sa kadalanan.

Dugay na nako nga gisugyot nga unta mopasar og ordinansa ang Cebu City nga magsugo sa tanang mga barangay sa paggahin og igong luna nga magamit aron katamnan og kahoy kon "mini forest." Ang mga barangay sa bukid kinahanglan usab nga magkawot og mga dagkung lungag diin mopundo ang tubig panahon sa ting-uwan kon water catchment area. Mahimo pa gayud kining buhian og tilapia ug ubang klase'ng isda. Mahimong mohatag og ayuda ug incentive ang city hall ngadto sa mga barangay. Dako kini’g matabang sa pagpugong sa baha.

Yuna pa, hain man diay kining gitawag og mga environmentalist nga wala man sila magpakabana niining grabeng baha ug lunop nga mahitabo dinhi sa Sugbo matag adunay kusog nga uwan? Nganong wa man sila moprotesta niining grabe'ng pag-quarry sa atong kabukiran nga maoy nag-unang hinungdan sa kusog nga bul-og sa tubig nga mobanlas padulong sa ubos nga mga barangay.

Makabungog man ang kahilum niining mga environmentalist pagbatok niining mga adunahang developers nga maoy naka-upaw sa atong kabukiran hinungdan sa pagpangatumpag ug pagdahili sa kayutaan niini. Ngano man, inyo ba kini sila'ng mga patron?

Maayo gani kay gitinuod gayud sa mga sakop sa Cebu City Mining and Regulatory Board ang paggukod niining mga illegal quarry operations. Keep up the good work Mr. Rene Mercado ug mga sakop sa CCMRB!

* * *

Kinahanglan gayud nga masirhan sa labing daling panahon ang Inayawan Sanitary Landfill. Grabe ang kadaut niini sa atong kalikupan ug ang baho niini makapabugnaw sa mga investors sa South Road Properties (SRP). Ambut kun tinuod ba kining akong nadunggan nga adunay mga tawo nga nalipay sa kalangay nga pagsira sa landfill tungod kay anaa man kunoy dakung salapi nga ilang makuha, dili gikan sa basura kun dili gikan sa mga nagtrabaho sa basura.

* * *

Nalipay ang taga-sitio Panagdait, Kasambagan, Cebu City sa ilang pagkakita kang Mayor Mike Rama nga nakig-alayon sa mga ahensiya sa gobiyerno ug pipila ka mga opisyal sa barangay sa pagtabang sa mga molupyo sa maong dapit nga naapektuhan sa dakung baha niadtong miaging semana. Nasayran sa mayor ang baha sa Panagdait tungod sa pagpahibawo kaniya ni Konsehal (first) George Chang.

Mao kini bintaha kun ang inyong mayor batan-on ug himsug og panglawas kay dali kini nga moresponde sa mga emerhensiya bisan unsang orasa. Apan aduna man hinooy himsug nga mga piniling opisyal nga tapulan nga dili gayud magpakabana panahon sa emerhensiya labi na kun layo pa ang eleksiyon. Unya na sila mosalida kun mangampanya na. Angay lang nga timan-an kini sila sa mga botante aron makabawos sila pinaagi sa balota.

* * *

Naalibyo ang gout ni Mr. Dodong Osmeña, tag-iya sa Abuhan Restaurant sulod lang sa duha ka adlaw nga pag-inom sa natural product nga akong gihisgutan niadtong miaging lindog.

* * *

Belated birthday greetings ngadto kang Jade, kamanghuran sa tulo nako ka mga anak, nga nagsaulog niadtong Oktubre 8 sa kasumaran sa iyang adlaw'ng natawhan uban kang Miah. (Karon pa ang akong pahalipay kay wala kini makarga sa niaging isyu). Bag-o lang siyang nahimong American citizen ug atua siya magtrabaho sa Chicago, Illinois isip opisyal sa usa ka dakung insurance company sa Estados Unidos. We're proud of you Jade!

* * *

Email:[email protected]