Ang love letter

Ang kaso sa atong labaw’ng hukmanan daugon na ba lang sa suwat sa abogado sa mga nalambigit sa kaso? Mao kini karon ang atong tukion. Ang kasong atong tukion mao ang kontrobersiyal nga hukom sa labaw’ng hukmanan sa kaso sa 1,400 ka mga flight attendants sa Philippine Airlines.

Aron masubay niadtong wala kaayo makasunod sa kaso mao kini ang nahitabo: Kaniadtong Hulyo 22, 2008 ang labaw’ng hukmanan mideklarar nga illegal o wala mahasubay sa balaud ang pagtangtang sa management sa Philippine Airlines sa ilang 1,400 ka mga flight attendants. Kay illegal o wala mahasubay sa balaud ang pagtangtang niini, kinahanglan nga ibalik sila sa trabaho nga walay minus sa ilang mga benepisyo.   

Tungod kay wala makauyon sa nahimong hukom sa labaw’ng hukmanan, ang Philippine Airlines miduso sa ilang motion for reconsideration. Apan pagka Oktobre 2, 2009 gibasura sa labaw’ng hukmanan ang motion nga giduso sa management sa Airlines company ug gibarugan ang una nang hukom sa pagka illegal sa pagtangtang sa kapin libo niining mga flight attendants. Tungod niini ang labawng hukmanan mideklarar nga final na ang ilang hukom ug dili na sila modawat og dugang pleadings o hangyo.

Apan sa takulahaw lang ang labaw’ng hukmanan midawat sa ikaduhang motion for reconsideration nga giduso sa management sa Philippine Airlines kaniadtong Enero 2, 2011. Kun nganong gidawat niini ang nahisgutang motion ang labaw’ng hukmanan lang ang nasayod niini. Hinoon bisan pa man sa ikaduhang motion for reconsideration nga giduso sa Airlines management ang labaw’ng hukmanan miingon gihapon nga illegal ang pagtangtang sa 1,400 ka mga flight attendants sa Philippine Airlines.

Karong bag-o nausab ang hukom sa labaw’ng hukmanan, mipabor na sa Airlines ang ilang hukom ug kun nganong mao kini ang nahitabo? Ang mga mahistrado lang sa labaw’ng hukmanan ang nasayod. Hinoon, adunay mikatap nga sulti-sulti nga ang nakapausab sa hukom sa mga mahistrado sa labaw’ng hukmanan mao ang sulat nga gipadala sa abogado sa Airlines ngadto sa mga mahistrado sa pinakataas nga hukmanan sa nasud. Kun tinood man ugaling kini, buot bang ipasabot nga ang kaso dili na daugon sa merito kun dili sa sulat na lamang sa mga abogado ngadto sa mga mahistrado? Peligro!

* * *

Kaniadtong Domingo sa imbetasyon ni Anol Mongaya akong nahimamat ug personal nga nakahinabi ang Chairman sa House Committee on Small Business and Entrepreneurship Development nga si Kongresista Teddy Casinio sa Party-list nga Bayan Muna. Sa among panagkukabildo na-interest ko sa iyang Chairmanship tungod kay naghisgot kini og gagmay nga mga magpapatigayon nga matud pa sa kongresista angayan nga tabangan ug agakon aron modako ug molambo. Matud pa sa kongresista nga angayan gayod nga hatagan og suporta sa gobyerno ang mga gagmay’ng magpapatigayon aron ang uban maingganyo sa pagsunod ug mao kini karon ang ilang gilihok. Ang kongresista makapaabot sa akong suporta kun ipadayon niini ang pagtabang ngadto sa mga gagmay’ng magpapatigayon.