Likoy

Giangkon sa usa ka kasaligan kaayong tinubdan diha sa Task Force Ellah Joy nga usa sa ilang mga testigo misugod na og likoy.

Kini nahitabo taliwa sa kasayuran nga dunay dakong kwarta nga gitanyag ang kampo sa akusado nga si Bella Ruby Santos aron bakwion sa mga testigo ang ilang pamahayag.

Ang abogado sa Criminal Investigation and Detection Group kon CIDG mikumpirmar sa report nga mitanyag ang kampo ni Santos og P500,000 bugti sa pagsibog sa mga tistigo.

Ang report gihimakak hinuon sa abogado ni Santos nga si Rameses Villagonzalo.

Apan ang tinubdan sa Lintunganay miingon nga apektado gyud ang usa sa ilang mga testigo.

Matud sa tinubdan nga nagpadungog-dungog na ang usa nila ka testigo nga gikapoy na siya sa kaso ug gusto na siyang moatras.

Kun di kapugngan sa kapolisan ug moatras ang maong testigo dako ni og epekto sa kasong kidnapping with homicide batok ni Santos ug sa langyaw niyang hinigugma nga si Ian Charles Griffiths.

Matud sa kasaligan nako nga tinubdan maguba ang usa ka habig sa complex crime nga ilang gisang-at.

Kini tungod kay dili na nila mapruwebahan ang homicide nga aspeto sa kaso.

Sa ato pa labihan ka importante sa maong testigo alang sa kalampusan sa kaso.

Kun magyaya ang kapolisan hayan mapornada ang ilang kahago pag-build-up sa kaso.

Dilikado og mahanaw gyud sa hingpit ang ilang trabaho. Diha na ra bay bagulbol nga atong nadunggan dihang ang National Bureau of Investigation maoy nakadakop ni Santos.

Bisan wala angkuna sa kapolisan nga nahiubos sila nga ang NBI maoy nakadakop ni Santos apan di mapugngan ang pagpanggawas sa estorya nga namasangil sa NBI nga nidawat og limpiyo.

Kun nahitabo man nga dili ang kapolisan maoy nakadakop ni Santos tingali angayan nilang pangutan-on ang ilang kaugalingon.

Basin sab baya og nangatulog sila sa pansitan mao nga wala nila madakpi si Santos?

Mao nga niining bag-ong kasayuran nga gihaylo ang mga testigo, angayang hugtan sa kapolisan ang ilang pagbantay sa ilang mga testigo kay basin baya dili lang lain maoy mokaon sa ilang linung-ag kun dili sila pay manglimpiyo sa hugaw nga gibilin sa uban.

* * *

[email protected]