Ang akong ikagasa

Si Honey nahigugma kang Cenard. Siya miingon: “Ang akong ikagasa kanimo inig-abot na sa tukmang panahon mao sila si John Rey ug Mary Therese. Panaad kadto nga dunay gibug-aton ug giubanan sa pagkamatinud-anon ug pagkamanggihatagon.

Sa mga mata sa katilingban karon, daghan sa mga tawo ang nagdumili nga mamahimong manggihatagon. Ug kun magmanggihatagon man, kini ang pagakuyogan og mga kondisyon.

Mohatag lamang kun mao kini...mao kana...mga kondisyon nga usahay lisud kaayo abton. Mga kondisyon nga nahimong babag aron tagamtamon ang kaanindot sa salag sa pakiglambigit.

Balik kang John Rey ug Mary Therese. Bisan pa man kun sila moabotay pa lamang ug anaa pa sa estado ug proseso sa umaabot nilang kinabuhi sila nakapahinumdom kanako nga dunay usa ka Honey nga mahigugmaong migasa sa iyang kinatibuk-an ngadto kang Cenard tungod sa gugmang padayon pang gipanday, giumol, giamomahan ug gipalipang taliwala sa mga mabiaybiayong hadla sa kapalaran.

Hinuon, alang kang Cenard ug Honey, ang kapalaran wala gilatid aron sila magpatara. Hinunoa ila kining gipili. Gikinahanglan lamang nila ang mapamalandungong panaw kuyog ang usa’g-usa. Kay matud pa: 

“It is more important to know where you are going than to get there quickly.”  (Michael Newcomber)