Klarong pasingit

Nangayo’g pasaylo ang mga organizer sa Road Revolution tungod sa kahasol nga dala sa ilang hinanggaw sa tulomanon. Apan dili pa gihapon sila motagam tungod kay padayon nilang ipahigayon ang maong kalihokan.

Gani adunay laing Road Revolution ang naka-schedule sa hinapos nga mga adlaw sa Oktubre. Ning higayona, adto kini sa Osmeña Boulevard, diin ang unang Road Revolution gipahigayon.

Gipaabot nga magdala na usab kini og dakong perwisyo ngadto sa katawhan. Ug grabe na usab nga batikos ang mapaabot sa mga organizer niini.

Hinuon naagwanta ra sa katawhan ang unang pagpahigayon sa Road Revolution. Nagtuo man gud kita nga mao ra kadto ug dili na mahitabo sa mga lugar nga puno sa economic activity.

Apan karon nag-anad na man hinuon kining nagpakaaron-ingnong mga environmentalists nga gipangulohan sa abogadong si Antonio Oposa ug Vince Cinches. Gusto na man hinuon nilang regular ang pagpahigayon sa maong Road Revolution.

Angayan nga tan-awon pag-ayo sa City Traffic Operations Management kining mao nga isyu. Hinaut nga dili dayon sila mohatag og permit ngadto sa mga organizer niining maong kalihokan. 

Ila usab unta nga huna-hunaon ang dakong puwerhisyo nga idulot niini ngadto sa kinabag-an sa dili pa sila mo-release og permit alang sa sunod nga Road Revolution.

Insakto ang panawagan sa pipila nga aduna untay public hearing nga ipahigayon sa dili pa hatagan og permit ang mga organizer. Kini tungod kay ang maong kalihokan dako man og epekto ngadto sa katawhan. Angay lamang nga ang kinabag-an adunay dakong pagtugot niini.

Alang kanako, gipahigayon unta una ang usa ka public consultation. Maayo unta nga mahibaw-an ang pulso sa katawhan tungod kay sila mismo ang mapuwerhisyo ning maong kalihokan. Karon hinaut nga nakakat-on na usab og dakong leksiyon ang CITOM niining maong isyu. Leksiyon sa dili nila pagpataka og pagtugot sa usa ka kalihokan nga adunay dakong epekto ang katawhan.

Hinuon wala koy nakitang dili maayo sa pagpahigayon sa Road Revolution.

Nindot kini nga kalihokan sa ubang sektor nga gitumong gayud pagpanalipod sa atong kalikopan.                            

Apan ang wala lamang nako nauyoni mao nga nganong kinahanglan nga ipahigayon pa man gayud kini sa mga busy nga lugar. Aron lamang ba nga mohangop ang katawhan sa dakong kawsa pagpanalipod sa kalikopan?

Adunay daghang lugar dinhi sa Sugbo nga haum alang sa Road Revolution. Adunay bukid o South Road Properties, nga mismo gitanyag ni Cebu City south district Representative Tomas Osmeña, diin puwede maglakaw ug magbiseklita ang mga partisipante.

Apan kun adto gayud kini ipahigayon sa mga lugar nga makabalda sa trapiko ug makahunong sa ekonomikanhong kalihokan, nan lain na kana nga estorya. Klarong pasingit na kana.

Walay maayong rason nga akong nakit-an ngano nga kinahanglan pa nga daghan ang mabalda aron lamang makaani og dakong simpatiya ang Road Revolution. Dili kana mao ang paagi pagdani og suporta.

Sakto ang giingon sa uban nga walay laing tumong kining mao nga kalihokan kondili ang pagpatagad lamang sa media. Gusto kining mga organizer nga mohakot gayud og dakong atensiyon sa media. Ug walay lugar ilang rumbohon kondili kadtong mga agianan sa kinabag-an sama sa Osmeña Boulevard.

Klarong panglawgaw kini ilang gibuhat. Dili gyud kini mapasaylo gumikan kay grabe ka hinanggaw kini nga ideya.

* * *

Email: [email protected]