Angay’ng mag-inabtik g’yud ang mga abogado sa dakbayan kay kun magluya-luya sila, sigurado nga kuhaon sa hukmanan ang P133 milyones gikan sa mga depository banks sa dakbayan sa Sugbo.
Miisyu na ang sheriff sa Regional Trial Court (RTC) Branch 9 og Notice of Garnishment gahapon ug gipadala kini sa upat ka bangko nga gidepositohan sa City Hall sa iyang kwarta.
Gipahibalo ni sheriff Antonio Bellones nga ang maong P133 milyones ibayad kini ngadto sa kabanayan ni Fr. Vicente Rallos kang kansang yuta matud pa gigamit nga karsada unya wala bayari sukad 1963.
Apan ingon sa wala mahadlok niini si Mayor Michael Rama nga mipahibalo nga mosukol siya og kumbati sa hukmanan kay gihulagway niya nga dili maayo nga isurinder lang dayon ang bandera sa dakbayan.
Ubos sa lagda, kadtong mga ma-subject sa garnishment order makahimo pagprotesta kun duna kini igong basihanan.
Matud ni kanhi konsehal Jocelyn Pesquera nga nakakuha siya’g dukomento, usa ka kasabotan nga gipirmahan sa tanang miangkong tag-iya sa Rallos Property, nga ang yuta nga buot nila pabayran sa dakbayan gitagana g’yud para sa karsada.
Nabutang kini sa kasabutan kon “Convenio” nga gilagdaan sa hukmanan kaniadto pang 1940. Sus, dugaya na, wala pa ko matawo. Kun molampos si Rama nga mapanalipdan ang kwarta sa dakbayan, saludo g’yud ang katawhan kaniya.
Nagduda g’yud ang mayor nga dunay mga tawo nga nagdali nga makabayad na ang dakbayan og klaro kaayo ang rason.
Matud ni Rama nga sa pagdinali-dali ni sheriff Bellones wala na niya mabantayi nga wala niya mausab ang petsa sa iyang dukomento nga giisyu ngadto sa upat ka depository bank sa dakbayan.
Samtang kagahapon kini niya giisyu ang petsa sa ubos Mayo 29, 2009… He! He! He! Kataw-anan! Ayoha sunod ang imong dukomento Sir uy kay wala dili magkatawa nimo si Mayor Rama.
* * *
Nakadawat og report si Market Administrator Raquel Arce nga ang mga tindahan nga gitukod diha sa North Reclamation Area alang sa mga nagpuyo kaniadto sa Mahiga Creek, gipuy-an na usab.
Bahad ni Arce nga kun kini iyang masuta sigurado nga mohimo siya’g aksyon kay siya man ang gitugyanan sa mayor pagpaniid. Pastilan, kamong mga tindera pagbantay g’yud kay mas tigas pa ra ba kini si Arce kay sa hepe sa SPEED.
* * *
Duna nay mga konsehal nga akong nahinabi ug sila miingon nga hayan dili na sila mosugot nga pangsirad-an ang mga karsada para sa road revolution. Kana, daghan g’yud ang malipay kun wala nay road revolution dinhi sa downtown.
Kun gusto mo, adto lagi sa SRP kay pareho mi’g baruganan si Kongresista Tomas Osmeña nga samok-samok lang ang maong kalihukan kun anhi himoa sa downtown area.
Ang gipasiatab sa mga tigpasiugda nga daghan kuno ang nalipay kay daghang nanglakaw sa karsada, pastilan intawon uy, daghang nanglakaw ug nagkusmod ang dagway kay wala man sila’y kasakyan!
Maayo tingali nga ang tigpasiugda niining maong mga kalihukan molakaw usab. Ang tumong nila ani ba kay aron mainila sila kay gitoohan man sa uban nga gipundohan sila sa mga langyaw’ng kahugpongan.
Balikon nako, walay nagpugong ninyo apan ayaw’g samok-samoka ang mga tawo nga nagdali nga bisan og Sabado ug Domingo dunay mga trabaho.