Ang chalk kon tisas maoy hinagiban sa mga magtutudlo di aron ipatay kundi aron iumol adlaw nga tanan sa kaalam nga ilang itudlo sa mga tinun-an sa eskuylahan.
Sa maong hinagiban, daghan na kaayong mga bantugang lider sa tibuok kalibotan nga namontar gumikan sa tisas.
Ang magtutudlo gitahasan sa kagamhanan sa pagtudlo, apan ang lugar sama sa lawak tun-anan, mga basahon, tisas ug uban pang gikinahanglan sa mga tinun-an, usa kini ka katungdanan sa kagamhanan.
Apan makapasubo uyamot tungod kay kun nakatubag ang kagamhanan sa ilang tahas sama sa pagpatukod og eskuylahan, pagpalit og mga libro ug uban pang kasangkapan alang sa mga tinun-an, nakalimtan nila ang numero unong hinagiban sa magtutudlo nga mao ang tisas.
Sa gigahin sa kagamhanan nga P300 matag buwan, nasinatian sa mga magtutudlo nga kuwang kaayo ang maong budget.
Sa laktud nasabtan sa mga magtutudlo nga diha sa ilang propesyon mura lang og dinaugdaog sila sa gobyerno nga wa sila hatagi sa hustong pagtagad.
Ang mga lider sa nasud maoy labing nasayud sa kamahinungdanon sa propesyon sa mga magtutudlo, apan sa ilang pag-umol og mga balaod bahin sa panuweldo, ilang gipakaubos pag-ayo ang panuhol sa magtutudlo nga para kanila susama ra sa ubang ordinaryong propesyon ug wa nila hunahunaa nga ang kaalam nga ilang nahuptan karon , utang nilang kabubut-on sa magtutudlo nga angay unta nilang bugtian og maayo pinaagi sa paghatag og maayong panuhol sa mga magtutudlo.
Apan ang labing pait kay sa kagamay sa ilang pagtan-aw sa propesyon sa magtutudlo, di lamang sa suhol nila kini gipakita kundi hasta pa ang numero unong hinagiban sa magtutudlo nga mao ang tisas, ila pang gihikaw.
Busa kun gipalanog man sa mga magtutudlo ang ilang sentimento bahin sa kakuwang sa P300 nga gahin alang tisas, may katarungan sila ug angay usab nilang ipatigbabaw ang ilang sentimento tungod kay ila kining katungod. Di ba?