Panglipat ni Tomas

Gisaway ni Kongresista Tomas Osmeña si Mayor Mike Rama tungod kay wala kini makasulbad sa mga suliran nga giatubang karon sa dakbayan sama sa kahuot sa trapiko, pagbaha sa kadalanan bisan sa hinay nga ulan ug mga illegal settlers. Apan ang kongresista gisumbatan ni Mayor Mike Rama. Giingnan sa mayor ang kongresista nga igo ra siyang nanunod sa mga suliran nga gibiyaan sa kongresista sa dihang siya pa ang mayor sa dakbayan sa Sugbo.

Sakto ang gihimong pagpanumbat sa mayor ngadto sa kongresista. Dapat lang nga mao kini ang iyang himoon tungod kay gustong ipalutaw sa kongresista nga walay nahimo sa nahisgutang suliran ang kasamtangang kagamhanan nga gidumala ni Mayor Mike Rama.

Ang suliran sa baha, huot nga trapiko ug illegal settlers anaa na kini sa dihang mayor pa ang kongresista. Kung buot huna-hunaon mas dako pa gani og tulubagon niining maong suliran ngadto sa katawhan ang kongresista tungod kay kinse (15) siya ka tuig nga naglingkod nga mayor sa dakbayan sa Sugbo ug sa maong gidugayon wala gyod siya makasumpo niini. Samtang si Mayor Mike Rama mopaingon pa lamang sa iyang ikaduhang tuig sa pagpangalagad isip mayor sa dakbayan sa Sugbo.

Buot manglipat ang kongresista sa katawhang Sugboanon ug mangduot sa iyang kapalpakan ngadto sa mayor nga igo lang nakasunod sa iyang lingkoranan diha sa City Hall aron guwapo siyang tan-awon ug bati ang mayor. Lumaban ka naman nang patas kongresman. Ayaw panglipat.  

* * *

Gisalindot ni maghuhukom Soliver Peras ang giduso nga hangyo sa kampo ni Kongresista Ruben Ecleo nga ipabasura ang warrant of arrest nga gipagawas niini ug agig tugbang ang kongresista mopiyansa og sobra sa usa ka milyon. Ang maghuhukom miingon nga walay merito ang hangyo sa kongresista.

Dili sa pagpanghilabot sa hukom, kun ako ang pabut-on mas maayo pay papiyansahon na lang ni og balik si Kongresista Ruben Ecleo tungod sa rason nga walay igong kapasidad ang atong mga awtoridad pagdakop ni Ecleo. Bisan gani sa pagpangita wala sila makakita sa kongresista, pagdakop na ba kaha niya.