Handumanan sa terorismo
Patay na ang utok sa terorismo nga si Osama Bin Laden apan ang mga uwat sa kadaot nga iyang nahimo nagpabilin.
Usa ka higayon niana iyang gipakurog ang mga nasud sa kalibutan dihang dungan nga giatake sa iyang mga sakop ang mga mahinungdanong dapit didto sa labing gamhanang nasud tangkod napulo ka tuig na ang milabay kagahapon.
Ang paghandom hinuon sa usa sa labing ngilngig nga trahedya sa kalibutan dili na sama ka sakit sa nanglabay nga mga tuig tungod kay ang katawhan sayod, labi pa ang pamilya sa mga biktima nga nakab-ot na nila ang hustisya.
Pipila ka buwan na ang milabay ang pwersa mismo sa America maoy mitapos sa utok sa terrorismo nga si Bin Laden didto sa Abottabad sa Pakistan.
Mao nga ang kaniadto haw-ang nga paghandom sa hitabo nahulipan na og daw pagmaya ug kalipay.
Kagabii oras nato dinhi sa Pilipinas gipasidunggan sa Amerika ang mga nakalas sa 9/11 terrorist attack pinaagi sa pagbukas sa usa ka plaza didto sa ground zero ang dapit nga kanhi gibarugan sa twin towers.
Ang parke dunay duha ka mga pool diin sa matag kilid niini gisipra ang tanang pangalan sa mga namatay sa insidente.
Sugod kagabii misiga sab ang labing kusog nga beam light gikan sa duha ka nagtupad nga pool.
Ang duha ka beam light magbarog ug makita nga labihan ka anyag panahon sa kagabhion nga daw sama sa twin towers.
Apil sa mga gipasidungan sa Amerika sa maong parke mao ang 20 ka mga Pilipino nga lakip sa mga nakalas dihang duha ka mga eruplano gibangga sa mga terrorista didto sa twin towers sa New York.
* * *
- Latest
- Trending
