Badyet alang sa turismo angay'ng padak-an

CEBU, Philippines -  Isip major tourist destination sa nasud, ang Sugbo dako na kaayo og nasapi sa industriya sa turismo. Tungod niini, angayan lang nga ang kagamhanan sa dakbayan ug lalawigan sa Sugbo nga magtambayayong sa pagpalambo sa industriya sa turismo dinhi sa Sugbo.

Sa uban nga mga kanasuran sa kalibotan sama sa Europe, Singapore, China ug Japan dako kaayo ang ilang badyet sa turismo. Kana tungod kay pinaagi sa turismo ang tanan nga katahom ug bahandi sa usa ka nasud mapadayag man.

Nasabtan usab sa host country nga ang turismo adunay "multiplier effect" sa ekonomiya sa usa ka "host country". Daghan ang paagi sa pagdani sa mga turista. Usa niini mao ang pagtanom og mga matahom nga bulak sa mga major highways sa usa ka dapit. Ikaduha, mao ang pagtukod og mga monumento o ang paglimpiyo sa usa ka dakbayan.

Kana ang hinungdan kun ngano nga kasagaran sa mga kanasuran sa Europe adunay daghang bulak. Bisan ang higante nga nasud sa China nakat-on na sa estilo sa Europe. Pananglit sa akong pagduaw sa dakbayan sa Shenzhen, China niadtong Disyembre 13, 2001 sangko sa langit ang akong pagbilib sa mga kabulakan nga naglinya sa major nga dalan sa maong dakbayan. Ang matag kilid sa wala ug tuo ilang gitamnan ug mga tulo ka metro nga gilapdon sa mga bulak nga niadtong higayona mao pay pagbuswak.

Ang maong tanom pulos bulak pula. Niadtong higayona namisbis ang mga lima ka tawo nga puros nag-uniform ngadto sa mga kabulakan. Gani, tungod sa katahom sa mga bulak ang mga turista sa wala nga bahin sa tourist bus namarog aron motan-aw sa mga bulak sa tuo nga kilid sa maong bus. Samtang ang mga turista usab sa tuo nga bahin namarog aron motan-aw sa wala nga kilid sa maong sakyanan.

Hangtod nga nahiabot kami sa "Windows of the World", usa ka major tourist destination sa Shenzhen City. Akong nakita nga ang pagmintin sa maong kabulakan nga sa akong pangagpas moabot og 15 kilometros dili basta-basta. Kun nahimo kini sa ubang dapit, nganong dili ta man kini mahimo?