Kapitoan-kapito

Septiyembre 11, 2011: Ikakawhaag-upat nga Domingo sulod sa tuig

Mga Pagbasa: Sir, 27;30-28;9/Sal. 103/Rom. 14;7-9Mt. 18;21-35

Ang pito o siyete mao ang paborito nakong numero tungod kay gawas kini ang petsa sa akong pagkatawo, mao pud kini ang numero ang nagpahinumdom kanako sa mga mahinungdanong panghitabo sa akong kinabuhi. Ang numero siyete alang sa mga Judio ug Judaismo nagkahulogan man og kahingpitan. Sa dihang si Pedro nangutana kun kapila pasayloon ang iyang igsuon makapito ba? Kini nagpasabot og usa ka hingpit nga pagpasaylo. Ug si Jesus mitubag nga dili lang pito kondili kapitoan kapito nga sa ato pa, walay katapusan.

Ang pagpasaylo ang nagkinahanglan og PANAHON aron maalim ang samad nga nahimo gumikan sa maong SALA nga nilugti sa kutay sa kalambigitan. Nagkinahanglan kini og GRASYA aron ang Dios nga misugod sa maayong butang diha kanimo ang magdala niini sa kahingpitan. Nagkinahanglan kini og KAMANGGIHATAGON aron ikaw makapasaylo sa imong kaugalingon ug sa uban Intellectually, Spiritually, Emotionally. Ug nagkinahanglan kini og GUGMA nga nagasukad diha sa pagpasaylo nimo mismo sa imong KAUGALINGON.