Moro-moro
Mismo ang usa sa mga representante sa Regional Tripartite Wages ang Productivity Board miangkon nga moro-moro lang ang kunohay nahitabong deliberasyon paghatag og P20 nga usbaw sa suholan sa mga mamumuo dinhi sa rehiyon.
Si Atty. Ernesto Carreon miingon nga moro-moro ang nahitabong deliberasyon sanglit way justification nga gihimo ang management sector nganong P20 ray ilang mahatag nga usbaw.
Matud ni Carreon nga diretso nila nga gibotaran ang maong kantidad nga wala man lay bisan gamay nga pagpasabot ang proponents.
Ubos sa ground rules sa RTWPB kinahanglan unta nga ijustify ang bisan unsa nga kantidad nga isugyot alang sa usbaw sa sweldo.
Si Carreon miingon nga sa dihang iyang giduso ang P100 nga umento iya ning gisuportahan og datus gikan sa mga ahensiya sa gobiyerno sama sa NEDA ug NSO.
Pananglitan matud niya nga dako kaayo og gintang ang minimum wage sa Sugbo ug Manila bisan kun dili tinuod nga mas taas ang standard of living didto.
Gibasihan ni Carreon mao ang poverty threshold sa duha ka mga dapit nga dili kaayo maglagyo.
Basi sa datus ang poverty threshold sa Sugbo P240 samtang didto sa Manila P247.
Mas taas sab ang inflation rate dinhi sa Sugbo kun itandi sa Manila. Samtang mas daghan ang mapalit sa piso didto sa Manila kumpara sa Sugbo mas dako sila og sweldo didto itandi dinhi sa ato.
Mao nga matud ni Carreon angayan gyud unta nga P100 ang usbaw sa suholan dinhi sa Sugbo.
Apan inay tubagon ang sugyot ang management sector uban ang mga representante sa government wala mosanong niini.
Hinuon ilang gisabutan ang mga representante sa labor. Resulta mao ang consuelo de bobo nga umento nga dili gani paigo ipalit og usa ka hiwa nga inun-onan.
* * *
- Latest
- Trending
