Mr. Bean

Matud pa nila: “Laughter is the best medicine.” Si Mr. Bean ang nabantog diha sa iyang mga pasiaw bisan wala’y daghang gisulti. Sa nawong lang daan, ingon man sa iyang mga linihokan, makakatawa gyud ka sa hilabihan. Mao nga sa mga higayon nga ako dunay hambinon nga suliran ug gibating dili maayo, ako mangita gyud kang Mr. Bean aron sa stress ako makuhaan.

Bisan unsa kayano ang kahigayonan matag adlaw, adunay dakong hinungdan kun nganong angay nato kining saulogon. Dunay bug-at nga rason kun nganong dili nato angay nga ihinako’g ang atong matam-is nga pahiyom.

Kun makatakod ang mug-ot nga nawong mas labaw nga makatakod ang pahiyom. Kun ang maong pahiyom imong ipasa diha mismo sa sayong kabuntagon dako kaayo kini og kahimoan aron makahatag ikaw og gilaw sa maong adlaw.

Busa katawa ug pahiyom gyud kanunay. Samtang akong gitagik kining maong lindog akong nadungog sa kuwarto ni Arthur ang awit ni Max Surban ug Yoyoy Villame nga nagkanayon: “Si Dagohoy ug Lapu-Lapu nakiggubat sa mga Hapon!” Salamat kang Mr. Bean ug nila ni Yoyoy ug Max kay akong nakita nga ang kinabuhi diay, usa ka dakong pasiaw.