Usa nako ka amigo angmidapit kanako nga mosulod sa iyang kuwarto. Usa siya ka interior designer by profession. Sa akong pagsulod na sa maong kuwarto ako nahingangha pag-ayo. Ang akong nakita, usa ka picture frame, katre, lampshade, lamesita ug bangko. Ang kasilyas sa sulod hawan gihapon kaayo. Dili sama sa akong kuwarto nga gubot kaayo tungod sa nagpasad nga mga libro, bulingon, punching bag, ug uban pang mga kagamitan ko. Relaxing kaayo ang maong kuwarto. Malinawon kaayo ang ambiance niini. Pun-an pa sa gipintal niya nga bugnaw ra kaayo sa mata. Simple apan therapeutic kaayo.
Mahinungdanon kaayo ang kuwarto. Matud pa sa akong higala nga si Johnny Cantero nga kun diha sa panimalay nga imong idesenyo seguroa gyud nga ang pinakaanindot ug ang pinakahapsay mao gyud ang imong kuwarto. Kay lagi diha sa imong kuwarto ikaw mopahulay ug magtigom og hustong enerhiya alang sa laing hugna sa pagkinabuhi sa sunod adlaw. Dugang pa, ang kuwarto nga hapsay bisan pa man sa kadiyotay sa mga dekorasyon ang usa ka maayong puy-anan aron ikaw makapahuway. Mao nga kasagaran sa dunay mga problema labina gyud ang nakasinati og depression ang dili maayong papuy-on sa kuwarto nga ngiob ug gubot kaayo. Gikinahanglang relaxing ang pahulayan nila aron sila mamaayo. Mao kun duna kay kahasol sa imong hunahuna ug kasingkasing, tan-awa kuno ang imong kuwarto. Basin anaa niini ang depekto. Hinuon, ang estado sa imong kuwarto maoy mosalamin usab sa imong pagkatawo.