Anaa ka lang unta

Sa matag higayon nga makasinati og suliran ang usa ka tawo wala kini magpasabot nga ihatag dayon nimo ang usa ka sulbad.

Ang mahinungdanon mao nga anaa ka sa maong mga takna sa kalisdanan. Ang imong presensiya dako na kaayo og kahimoan aron ang hingtungdan makaamgo nga ikaw   nagauban kaniya. Sama gud pananglit sa usa ka asawa nga nagbati kay manganakay na, duna bay mahimo ang iyang bana aron mominos ang sakit nga iyang gibati?

Wala apan gikinahanglan gyud nga ang bana anaa magauban kaniya. O pananglit sa himatyon nga tawo, ngano man gyud nga mag-alirong ang mga sakop sa banay, nagpasabot ba gud kini nga mapugngan nila ang kamatayon? Dili. Apan ang maong panagtigom ang nagpasabot nga silang sakop sa panimalay ang andam makig-unong diha sa pagpagikan sa himatyon sa laing hugna sa iyang panaw sa kinabuhing walay katapusan.

Pagkalisud nga ikaw rang usa ug mas lisud gyud nga walay tawo nga unta relasyonal ang mosakripisyo aron duyogan ka sa imong kalisud. Anaa ka lang unta, dili unta ko maingon ini.