Pasiatab ra diay?

Uy, pasiatab ra man diay kadtong report nga hingusgan na kuno sa mga opisyal sa Argao ang kampanya batok sa mga drayber og sakyanan, ilabi na ang motorsiklo, nga dili motuman sa mga lagda nga gilatid sa Republic Act 4136.

Ako man gani sila nga gidayeg kaniadto kay dalaygon man kaayo kun ila kining himoon kutob ra man diay sa pasiatab. Si DYLA reporter Dario Gil nga taga Argao maoy mireport niadto nga paspasan na ang pagpanakop sa masalaypong drayber sa Argao. Nalipay ko apan ang akong kalipay daw napawong kay human sa ubay-ubay nga mga semana, kagahapon si Dario Gil mireport na usab nga wala man diay tumana sa mga opisyal sa Argao ang ilang gipasiatab.

Karon, ang kapolisan na usab sa Oslob nga gipangulohan ni Senior Inspector Raymund Rodriguez maoy mipahingusog sa kampanya batok sa mga abusadong drayber.

Kun magtan-aw ko sa mga drayber nga dili gayud motuman sa gilatid nga lagda, makapanglingo-lingo g’yud ko. Kami nga mga law enforcers sa Land Transportation Office, sakop sa Task Force Alpha, dili gayud unta gusto manakop.

Apan mapugos kami sa pagdakop sa mga masalaypong drayber aron pagtudlo kanila og leksyon. Usahay bitaw, kay magsakay ra man ko og motorsiklo, mapugos g’yud ko pagdakop sa ubang drayber nga abusado. Espoko mo nga dunay mga drayber nga dili motuman og traffic lights ug mosirit lang bisan “stop” pa ang signal. Reckless driving ang iyang gihimo kay mahimo man nga madam-agan siya sa pagdiritso ra sa stop signal.

Ang pag-disregard sa mga traffic signs nalakip sa mga kalapasan nga ang drayber mahimong pamultahon basi sa multa sa reckless driving. Pila? Aw didto na lang pangutana sa LTO aron dili mo makuyapan og sayo.

* * *

Ang gihimo ni Mayor Michael Rama nga paghatag sa incentive sa mga senior citizens nga gitunga-tunga, makapabati kaniya sa mga mata sa mga tiguwang.

Sa usa ka barangay dinhi sa dakbayan, gipangutana ko sa nagkanguhal na nga tiguwang kun wala na ba kuno’y kwarta ang City Hall para sa mga senior citizens.

Wala ko makatubag dayon. Akong gihuna-huna kun nganong nakasulti niini ang maong tiguwang. Mao diay kay kaniadto sa panahon ni kanhi mayor Tomas Osmeña gidungan man paghatag ang P4,000 unya gihimo sa buwan sa Abril.

Gingisihan nako ang tiguwang og giingnan. “Dili na man gud karon eleksyon Manoy.”

* * *

Kining pagpanghatag og PhilHealth cards ngadto sa mga kabus nga pamilya dinhi sa dakbayan nindot baya kini, apan ang pangutana kun kanus-a kini hangtud nga magamit?

Sa kadaghan na sa mga proyekto sa dakbayan nahadlok ko nga basin og magnihit ang kwarta sa dakbayan ug dili na kagahinan og kwarta kining maong mga gastohan. Sayonan ka nga naa pa ang scholarship program nga magtubo og mga P60 milyones matag tuig. Maato pa kaha sa dakbayan ang maong mga bayranan? 

Kini ra ba si Tessie Camarillo nga maoy acting city treasurer sa pagka karon may pagkahinay ra ba kini mangolekta matud ni kanhi mayor Tomas Osmeña. Ang nakaayo lang niya kay dili kuno corrupt.

Hinoon, gipaabut man g’yud nga mosaka ang koleksyon sa Cebu City government kay daghan man nga mga building nga nangahuman na ug misugod na pag-operate.