Aron ka modaug

Ila-ilaha ang imong mga kaaway......ilha ang imong kaugalingon.Kini mao ang praktikal nga tambag sa Art of War alang niadtong buot magmadaugon sa bisan unsang away o gubat. Apan ang wala lang hisayri sa kadaghanan nga kun ang suod mong higala mao ang imong kaugalingon, kini usab nagpasabot nga ang hingpit mong kaaway mao usab ang imong kaugalingon. Ang anaa lamang sa gawas mao ang mga hinungaw kun unsay nahitabo sa sulod sa imong kaugalingon mismo. We become what we hate matud pa. Ang sakit, kay daghan nato ang bisan dunay hustong pangisip ang nahimong bogo sa pakigharong sa kamatuoran nga ang kinabuhi diay usahay brutal. Dunay mga panghitabo nga mohugpa kanimo nga wala mo damha. Dili maayo ihatag ang tanan kay lisud nang walay mahabilin alang kanimo.

Sama pananglit sa usa ka lalaki nga nihatag sa kinatibuk-an sa iyang pagkatawo aron lamang ipakita ang iyang paghigugma sa iyang hinigugma ug sa kalit lang siya pagaingnon: “Dili mahimo kay abnormal ang atong relasyon”. Dinhi na lang kutob ug sukad niadto usa ka makabongog nga kahilom ang ibalos niya sa pangindahay nga mabalik pa ang samdan nga relasyon nga niresulta sa pagkuyaig sa   nahabiling kusog ug rason sa pag pakabuhi.Walay ayo dili ba? Labaw na nga walay lami?

Apan sa unsa mang paagiha nga pukanon mo ang imong kaugalingong kalasbag gumikan sa mga pagbating dili hisabtan? Bugtong panahon lamang ang makasulti. Kay bisan gani ang pinakalohikal nga tambag nila kanimo nga nagpakabana ang daw sama sa masabang piyangpiyang nga mihasol kanimo panahon sa kagabhion. Ang katulog nga maoy paagi aron ikaw makapahuway ang nahimo naman hinuong urom sa nag-alindasay mong kaugalingon. Ilha ang imong kaugalingon nga nahimo mong mortal nga kaaway sa mga higayon sa kalibog ning paagiha tingali modaug ka sa gubat sa tawhanong pagpangita sa kahulogan.......