EDITORYAL - Ang kuwarta sa PCSO ug PAGCOR

Ang duha ka ahensya sa gobyerno nga nagdumala sa kuwarta sa mga sugarol giingong maoy gatasan sa mga suhito kaayo sa panapi ning maong mga ahensya nga way lain kundi ang mga tag-as nga lider sa nasud kinsa maoy dali kaayong makamandar ngadto ni kinsa mang nagdumala sa maong mga ahensya.

Kini tungod kay ang mga senador nagpakita nga karon pa sila makadiskobre sa mga di maayong sistema sa pagduma sa kinitaan sa Philippine Charity Sweepstakes Office (PCSO) ug sa Philippine Amusement and Gaming Corporation (PAGCOR).

Bisan kini mga korporasyong kontrolado sa gobyerno nga adunay kaugalingon niyang kinitaan apan sa tuno sa sugyot ni Senador Ralph Recto nga angay nang itakli sa nasudnong pundo ang gitawag nga discretionary funds niining mga ahensyaha, nagpaila nga  ila lang diay kining gipasagdan     nga mao ray magdominar sa ilang kinitaan.

Gumikan sa kahayahay sa nagpadagan niini, sayon ra usab nilang ipakilkil sa mga dagko sa gobyerno aron ipamalit og mga butang di alang sa kapuslanan sa tanan sama sa mga pajero sa mga Obispo.

Kini tungod kay ang misyon sa gastohanan sa kuwarta nga kitaon ning maong mga ahensya, para ra diay kuno sa mga pagpamalit og mga kasangkapan, tambal ug uban pang panginahanglan sa mga kabus  nga masakiton.

Apan wa kaayo matataw sa mga senador kun maayo bang pagkabantay ang kuwartang kitaon ning mga ahensyaha tungod kay lahi sa Bureau of Customs, BIR, LTO, LTFRB ug uban pa kinsa gikotahan   sa kagamhanan sa angayan nilang kitaon matag tuig.

Kay ang kinitaan kuno niining Pagcor ug PCSO, ang mga nagdumala lang maoy gipabuot kun unsaon nila paggasto hinungdan nga gisugyot ni Recto nga sukad karon angay nang ihandos    ngadto sa national funds ang income sa maong mga ahensya aron magamit kini alang sa tanang panginahanglan sa nasudnong kagamhanan.

Nagkahulogan nga kun mahitabo kana dako na kaayo kini og ikatampo sa nasudnong gahin matag tuig   nga di na kinahanglan pang magpatuman og laing umento sa buhis sa nasud. Di   ba?