SPEED gising!

Karon pa ko masayud nga pwerteng daghana na man diay’ng sakop ang Squatters Prevention Encroachment Elimination Division (SPEED) pagka karon. Kapin na sila sa usa ka gatus.

Nalipay ko pagkasayod nga gidugangan na og mga sakop ang SPEED aron makalihok na g’yud sila’g maayo ug mapahapsay na nila ang karsada ug aseras, apan nasubo ko tungod sa report nga dunay pipila kanila nga nagbinuang.

Ang binuang nga akong gipasabot mao nga dunay mga sakop sa SPEED nga walay uwaw. Sayonan ka nga mokaon sila sa baligya sa mga tindera nga walay bayad-bayad? Unsa gud tawon nang batasana? Kabastos gud ninyo. Unsaon ninyo pagkakuha’g respito gikan sa mga tindera kun ingon niana ang inyong batasan? Kinsa ba’y nagpili o nagpasulod niining maong mga sakop sa SPEED? Matud sa akong nahibaw-an dunay ubang mga pinasulod sa mga konsehal sa dakbayan.

Akong klarohon nga walay labot ang mga konsehal sa binuang sa ilang mga pinasulod sa trabaho apan angay unta nila nga hashasan ug ilhon pag-ayo ang batasan sa ilang mga gipasulod sa trabaho.

Kaniadtong miaging Huwebes sa hapon, ang pito ka walay uwaw nga mga sakop sa SPEED mihugpa sa usa ka tindahan sa sidewalk vendor, dili lang nako usa itug-an og diin dapit ang nahimutangan sa maong vendor ug nangayo sila’g makaon.

Dihang nabusog na sa pagkinaon ug tungod sa pagsuyop nila sa tagsa ka botelya nga softdrinks, igo lang nagpasalamat og nanglakaw. Pastilan, pagka walay uwaw nga mga tawo.

Natural nga dili makabalibad ang sidewalk vendor nga mangayo sila’g libre nga snack kay kun dili mohatag kanila’g ilang “masabsab” posible nga ilang dakpon ug daku pa hinoon kuno ang iyang mabayran sa multa.

Isip lider sa SPEED, awhagon nako si Noel Artes nga atimanon dayon niya kining maong binuang sa pipila niya ka sakop. Ikaw mismo kay daghan ka man og mga kaila ug higala nga tindera, pagpangutana.

Kun imo kining himoon Mr. Artes nasiguro ko nga dili magpanuko ang mga tindera sa pagtug-an sa binuang sa uban nimong mga sakop kun makita nila nga seryoso ka nga mopitol sa binuang.

Daygon ka sa katawhan Mr. Artes kun personal ka nga mogukod sa binuang sa imong mga bilyako nga sakop kay sa piyongon mo lang ang imong mga mata ug magpabuta-bungol nga daw wala makakita ug makadungog sa tinonto.

Unya, unaha ninyo paglimpyo ang mga aseras ug karsada nga dunay nagpahimutang nga tindera nga nakababag sa pag-agi sa mga tawo ug sakyanan, ayaw didto sa mga dapit nga hapsay.

Personal g’yud ko nga nakasaksi dihang gidakop sa mga sakop sa SPEED ang usa ka vendor kaniadtong Huwebes sa hapon. Usa sa mga sakop sa SPEED dihang nakarga na ang baligya nga makaon, miaksyon pagkuha. Ibutang nato nga komedya ra niya kadto, apan salawayon kaayo kini tungod kay sa paghimo niya dihang daghang mga mata nga nagtutok kaniya. Bisan ako nakapangutana kun nganong kadto maoy giuna nila pagsikop.

Wala man gani nila mahapsay ang aseras sa Osmeña Boulevard gikan sa atubangan sa University of Cebu (UC) paingon sa dalan Colon? Kana unta ang giuna nila kay ang “both sides” sa aseras dunay mga naninda ug gamay na lang kaayo ang nahabilin nga kaagian sa mga tawo. Paabota ugma, kay duna pa ko’y dugang exposé sa bati nga binuhatan sa pipila ka sakop sa SPEED.