Pagpamalandong alang sa Malangkubong Kaayohan

Positive stroking

Karong mga panahona, mas daghan ang mogahin og panahon sa pagpaminaw sa mga negatibong panghitabo, impormasyon, o komentaryo kaysa positibong mga butang. Matud pa nila: “Dili mahalin ang newspapers kun wala ang patay, lugos, tulis, kawat, intriga ug uban pa.” Hinuon dili kita makabasol sanglit mao man kini ang napatik kay lagi, kini man pud ang mga panghitabo.

 Apan angay lamang natong hisayran nga ingon nga tawo nagkinahanglan kita og positive stroking. Si Carl Rogers ang nitawag niini og: The Need for Positive Regard. Kini naglangkob sa pagpangita sa mainit nga pagdawat sa usa ka tawo, simpatiya, pag-uyon ug labaw sa tanan ang paghigugma. Ang bata nga nakasinati sa positive regard gikan sa iyang mga ginikanan, kun nasinati niya nga gihatagan siya’g bili nila sa wala’y latid nga kondisyon. Nga sa ato pa, ang maong akto sa pagdawat wala mag-agad sa ganti o silot nga basehan. Wala’y kondisyon ang maong pagpadangat sa maong positive regard. Mao nga ang bata motubo ingon nga usa ka himsog nga tawo ugma      damlag.

Dili sama sa kadaghanan karon nga matawag nga makadawat lamang sa positive stroking kun matagbaw sa usa ka tawo ang iyang significant other ingon man ang panginahanglan niini nga kab-oton pinaagi niya. Sulayi ang positive stroking karong adlawa. Imbis imong iyagyag ang mga dautang panahom, pagmanggihatagon diha sa imong pagbutyag sa bisan unsang nindot nga imong nakita sa imong isigkaingon. Himoa kini sa paagi nga matinud-anon.