Kinsa nga "Art"

Kinsa kaha ang tawo nga gihinganlan og “Art” nga giingon ni Zaldy Ampatuan nga maoy midawat sa P200 milyones nga kickback para kang kanhi Pres. Gloria Arroyo.

Si suspendidong Gob. Zaldy Ampatuan mitug-an kang Anthony Taberna sa usa sa mga TV interview kalabot sa mga kahiwian sa miaging administrasyon didto sa Autonomous Region in Muslim Mindanao.

Milutaw ang ngalan nga “Art” sa interview sa dihang naghisgot og mga kickbaks alang sa kanhi presidente.

Wala ko makakita sa maong interview, apan ang maong balita mikatap sama og dautan nga hangin nga nakapa-interes sa pipila ka mga Sugboanon tungod kay adunay usa ka “Art” nga Sugboanon nga nagtangag og apilyedo sa usa ka politiko nga nanag-iya og terminal ug towing firm.

Apan adunay laing “Art” nga sakop sa kabinete ni Arroyo kaniadto, apan ilado siya sa Bohol tungod kay didto kini nakadaog sa iyang pagka-kongresista karon.

Sa duha ka “Art” makalibog kinsa kanang gihinganlan ni Zaldy Ampatuan sa interview ni Anthony Taberna. Apan matud pang Zaldy Ampatuan nga makaila ra siya ni “Art” nga maoy nagdawat sa P200 milyones kun ibalik kini og paatubang kaniya.

Nakuryoso lang ko kinsa niining duha ka “Art” kay silang duha parehong adunay mga koneksiyon sa kanhi administrasyon. Ug sa akong nahipos nga impormasyon, amigo usab kaayo silang duha ug magkitakita sa mga salo-salo ug inom-inom.

Kining usa ka “Art” sama sa akong giingong sa unahan, politiko og apilyedo. Unya nag-apil-apil kini og mga transaksiyon sa National Food Authority (NFA).

Gani, mao kini siya nga “Art” ang giingong nahatagan og pabor sa NFA sa administrasyon ni Arroyo.

Ang NFA gihimo aron maseguro nga matag pamilyang Pilipino adunay makaon matag adlaw.

Gani, kining mga NFA rice gituyo gayod kini sa pagbaligya og barato nga kantidad og P25 kada kilo ngadto sa mga kabus nga dili makapalit og mahalong bugas.

Matud sa atong kasaligang tinubdan, adunay sais (6) milyones ka sakong bugas humay nga gisubasta sa NFA nga si “Art” ang nakadaog.

Apan kining maong bugas nga nadag-an sa subasta (auction) ni “Art” gipabayran lang og P16 matag kilo. Apan gi-authorize si “Art” nga makabaligya niini og P25 kada kilo.

Pilay ginansiya niya sa uom ka milyon ka sako?

Hangtod karon, nagsige gihapon ang pag-import og bugas niya ginamit ang NFA allocation sa mga local rice traders.

Kini kaha sa duha ka “Art” ang gipasabot ni Zaldy Ampatuan?

Sa sunod nga Tikdol, atangi!

* * *

Ang turismo nga maoy mipabarog sa isla sa Mactan kun unsa kini karon sa kalibutanong mapa, padayon nga gipanghambog sa administrasyon sa dakbayan sa Lapulapu.

Sa iyang State of the City Address niadtong Hulyo 20 sa bag-ong Lapulapu Hoops Dome, gisaysay ni Mayor Paz Radaza giunsa niya sa pag-handle ang krisis sa turismo sa miaging tuig nunot niadtong hostage crisis sa Quirino Grandstand.

Gawas sa pagpalambo sa peace and order pinaagi sa paghatag og ayuda sa kapolisan, ilabi na sa mga tourist police, ang kagamhanan sa Lapulapu mismo ang mipasiugda og programa nga nakapadugok og mga turista sa mga hotel ug resort sa isla bisan sa krisis sa turismo nga giatubang sa nasud.

 Wala makalimot sa pagbatbat sa iyang SOCA 2011 si Radaza giunsa niya sa pag-handle ang krisis.

Ug sa tanang mga lokal nga kagamhanan, ang dakbayan sa Lapulapu lamang akong nadunggan nga nagtanyag og Island Experience promo nga nagtanyag og 50 porsiyento nga diskuwento alang sa mga lokal nga turista nga moduaw sa mga hotel ug resort nga miapil sa programa.

Natabangan ang krisis hinungdan nga 15 porsiyento lamang ang pagkubos sa mga turista. Sumala pa ni Radaza nga tungod sa maong programa, nahimong steady ug paspas ang pag-recover nga sulod sa tulo ka bulan, nabalik ang gidaghanon sa mga bisita sama sa gidaghanon sa Agosto 2010, sa wala pa ang hostage crisis.  

Human gilusad ang Island Experience promo, ang gidaghanon sa mga lokal nga mga turista nga miduaw sa isla sa Lapulapu misaka og 28 porsiyento sa Oktubre ug laing 40 porsiyento sa Nobiyembre, sumala pa sa mayor.

Sa pagtapos sa programa niadtong Diyembre, si Radaza miingon nga ang occupancy sa mga lokal nga mga turista miabot og 65 porsiyento ikomparar sa Agosto nga occupancy level.

Ug wala na buhii ang rekord isip lugar nga gustong dayuhon sa mga turista.

Ang Lapulapu milampos sa mga pag-host sa Davis Cup international tennis tournament ug nakumpleto ang dako kaayo ug airconditioned nga sports stadium, ang Hoops Dome nga natuman pinaagi usab sa abag ni Konsehal Harry Radaza.

Ang Kadaugan sa Mactan gibag-o usab ang pagsaulog, nga nahimong sikat ug duawonon dili lang sa mga Oponganon, kun dili sa mga lokal ug internasyonal nga mga turista.