Ang gipuhonan sa gipangandoy nga bahandi

Natural ra kaayo nga daghan nato ang dili buot og alkanse. Buot nato nga unta moginansiya gyud unta ta. Ug kay buot man gyud kita nga moginansiya, mao nga kita morisgo ug mobuhi og puhonan aron lamang makuha nato ang atong giisip ug gituohan nga usa ka mutya o usa ka bahandi. Ug kay sila bahandi naman alang kanato sa ato pa usa kini ka mahinungdanong bahin alang kanato nga ang paghatag niini nagkahulogan usab og paghatag mismo sa atong kaugalingon.

Sama usab sa atong kinabuhi aduna kita’y ihiklin aron hulipan sa giisip natong mas bililhon pa kaysa atong nahuptan. Ug padayon natong pangitaon ang maong bahandi taliwala sa mga risgo nga atong mahiagoman. Hinuon dili sa tanang higayon ang tawo hisabtan sa iyang isigkaingon gumikan sa iyang pagahimuong pagpili. Maingon nga diha sa imong pagpili sa Diosnong pamaagi dili sa tanang higayon ikaw pagauyonan. Adunay mga higayon man gani nga hisaypan ka nga usa ka buangbuang...Apan lagi, dili nimo makita ang kahulogan sa imong kinabuhi hangtud nga imong makita ang maong mutya. Kun kainit ang imong tinguha sa pagpangita sa mga butang o kalibutanong panginahanglan, ingon ini ba usab kainit ang imong tinguha sa pagpangita sa Espirituhanong katagbawan?