EDITORYAL - Gwen hulga ni Tommy?

Kun mahinayon kining gikabalak-an ni Kongresista Tommy nga mokandidato pagka-mayor si Gobernador Gwen sa dakbayan sa Sugbo karong umaabot nga election , aw nia dinhi ang dakong sambunot politikanhon   sa duha ka hari sa siyudad sa Sugbo ug hari sa lalawigan sa Sugbo.

Kay sa pagkatinuod kun si Mayor Mike lay kontra ni Tommy , aw mao pay pag-ingnon hayahay pa sa polis ang naulahi.

Kini tungod kay daghan man siya og ikalabay nga isyu batok kang Mike , kay iya mang kanhi kauban sa BOPK, busa maingon nga sagkaon kaayo ang kadaugan ni Mike batok kang Tom.

Apan kun si Gwen ug Mike mag-uban versus Tom ug Vice Mayor Joy Augustos Young, anhi gyud makita ang labok sa balaw, kun sa manok pa.

Kay kun tandion ang kinaiya ni Gwen ug Mike, pareho nga dali duolon, samtang si Tom ug Joy pareho usab nga mga pintok kaayong manginsulto og tawo ilabi na kun di nila hiayonan.

Ning higayona kun mapildi si Tom, murag maglisud na siya pagsulod pagbalik sa dakbayan sa Sugbo kay nakita ra ba sa mga Sugboanon nga maayo moalima si Gwen sa mga lungsoranon ug may agi na siyang dalaygon sa lalawigan.

Hinuon ang isyu bahin sa Balili property, maoy lig-ong buwang ni Tom nga ikahansak batok ni Gwen, apan nagtuo ta nga may mga panagang na si Gwen kalabot ning maong isyu.

Unya kining gipakita ni Gwen nga pagpanghatag og hinabang sa mga nabiktima sa sunog ug uban pang nanginahanglang mga kabus, dako na kaayo ning puntosa pabor ni Gwen.

Kay si Tom murag wa man kaayo makamontar sa pagpasalida sa iyang mga hinabang sa mga nagsunod-sunod nga sunog ning dakbayan , gawas kaha kun mag-ampo siya og dugang mga sunog nga atangan na niya sa iyang giandam nga mga hinabang ang mahimong biktima. Di   ba?