Omb-Vis hilig sa gagmay nga isda

Aduna naman untay napilian ang Malacañang nga mosunod nga Ombudsman, wala man diay gihapon mahuman ang pa-bilib ug exhibition sa duha ka mga linalang diha sa Office of the Ombudsman.

Silang Deputy Ombudsman for the Visayas Pelagio Apostol ug Over-all Deputy Ombudsman nga karon maoy acting Ombudsman nga si Orlando Casimiro nagpunay na lang og pa-bilib ngadtong Pres. Noynoy Aquino, iyawat pilion sa pagka-ombudsman hulip sa mi-resign nga si Merceditas Gutierez.

Tingale, wala kini manghunong sa pagpa-bilib kining duha sa pangiyawat nga itudlo og laing taastaas nga puwesto.

Tungod sa ilang pabilib nagpunay na lang sila og pang-file og kaso sa mga personalidad sa kanhi administrasyon. Wala maka-eskapo mismo si kanhi Pres. Gloria Arroyo.

Dinhi sa Cebu, nahimo gyud intawon nga sacrificial lamb ang 18 ka mga tinudlong opisyal sa kagamhanan sa dakbayan sa Lapulapu tungod sa sobrang pabilib ni Apostol ngadto sa pamunoan ni Aquino.

Apan ang duha maayong hunghongan: “Too late the heroes.” Sa ato pa, ulahi na ang tanan tungod kay may napilian na si Noynoy nga sunod ombudsman.

Dili unta mag-ingon niini silang Apostol ug Casimiro.

Tiaw mo na, mga gagmay’ng isda ra gyud intawon ang madalidali nila og daog-daog.

Kining isyu sa giingong overpricing sa gipamalit nga 470 ka mga computer sets sa dakbayan sa Lapulapu nga gi-file sa negosyanteng si Jun Pelaez, nagtuo ko nga nasulbad na kini.

Nagtuo ko nga napasabot na kini sa mga opisyal sa dakbayan sa Lapulapu.

Sumala pa sa reklamo nga mahal ra ang presyo sa matag computer set nga nagkantidad og P50 mil. Apan natubag naman kini sa mga opisyal nga matud pa dako-dako ang presyo matag usa tungod kay dili lamang ang computer maoy gibayran, apan apil na niini ang delivery, installation, warranty ug ang bayad sa training.

Ang presyo nga gibasehan sa Ombudsman Visayas sa pagtino sa kamahal niini mao ang mga computer nga mapalit sa tuig 2007, dili sa 2004. Siyempre, kun itandi, mas barato gyud ang mga computers sa 2007 kay sa 2004 kanus-a gipamalit ang mga computer sets nga gibutang sa isla sa Caubian, Olango ug Pangan-an sa Lapulapu.

Apan kining presyo sa mga computer sets nga gipamalit sa dakbayan ubos sa pamunoan ni kanhi mayor, karon Kongresista Arturo Radaza, mas barato gani kini kay sa gipamalit kaniadto ni Kongresista Raul del Mar.

Pero unsaon ta man, tawo ra man gud gihapon kanang mga sakop sa Ombudsman, ilabi na ang deputy ombudsman for the Visayas nga si Apostol nga adunay kaugalingong bias batok sa mga gagmay’ng isda.

Kun ato kaha siyang pangumustahon sa mga kaso ni Gob. Gwendolyn Garcia kalabot sa overpricing anang Cebu International Convention Center nga karon nag-anam na og kangil-ad ang lugar? Aduna ba kahay matubag si Apostol unsa nay nahitabo niining kasoha?

Ang kaso nga pagpalit sa Balili property nga halapad naglubog sa tubig-dagat hangtod karon, naglutawlutaw pa gihapon ug walay resolusyon. Nganong giyak-an man kini ni Apostol?

* * *

Ang panagkunsabo sa mga opisyal sa Philippine Charity Sweepstakes Office (PCSO) ug mga senador aron dauton ang Simbahang Katoliko sa nasud ug wala nay babag ang administrasyong Aquino sa pagduso sa imoral nga Reproductive Health Bill wala mosaler.

Apan human na madaot ang mga lider sa simbahan, ang mga Obispo nga nagpatabang lamang sa gobyerno aron makatabang usab sila sa gobyerno pagserbisyo sa mga kabus ug biniyaan.

Human na madaot ang mga Obispo sa mata sa publiko sa dihang gipasiatab sa mga opisyal sa PCSO nga mga Sport Utility Vehicles ang ilang nadawat nga mga sakyanan gikan sa PCSO. Apan sa dihang gipang-uli na sa mga Obispo ang mga sakyanan ngadto sa Senado, puwerte man diay’ng kalaksot sa uban, nindot pa ang sakyanan sa akong kumpareng si Fred Languido.

Hinaot unta nga dili mobahar ang mga Obispo sa pagpakigbatok sa RHB.

Inay, gamiton sa mga Obispo ang pagpangdaot sa administrasyong Aquino ngadto sa Simbahan isip hagit aron mas mapakusgan pa ang atong kawsa pagbuntog sa mga dautan nga giplano sa kagamhanang Aquino.

Kitang mga magtutuo angay’ng dili mohunong sa pag-ampo alang sa atong mga lider nga nadamay o gidamay aron mabutang sa alanganin.

Kun gamiton sa gobyerno ang kuwarta ug impluwensiya aron ipamugos kanang balaod nga maglegalisar sa abortion ug mobukas pa sa ganghaan sa baha sa korupsiyon sa gobyerno, wala kitay laing hinagiban gawas sa atong mga pag-ampo.