Kay kasaulogan man

“Sir, pahulama ko og kuwarta Sir, kay akong ipa-ospital ang akong kaugalingon Sir!” Daw sa hangyo lubo kong pangamuyo ngadto kang Mr. Komkom. Siya ang among labaw. Igo lang kining nanglingo-lingo dungan ang hugtanong pagbalibad: “Walay kuwarta ang kompanya Aldong aron ikasuporta sa imong hangyo.” Ako siyang giingnan nga “Diyes Mil” unta Sir ug ako lang ning hinayhinayan og bayad sa matag higayon nga ako masuweldohan.” Apan hugtanon siyang mibalibad nga walay kuwarta...walay kuwarta...walay kuwarta...ug walay kuwarta! Daw sa dili nako matino kun mabuhi pa ang dugay nang patay kong pagkatawo ning negosyanteng misupsop sa katapusang duga sa akong kinabuhi. Mao nga daghan kanamong ilang mga lumilihok ang padayong nag-ilaid sa walay hinungdang kalisud. Apan unsa man usa lamang ako ka yanong mamumuo ning kompaniya kang kansang tagdumala ug tag-iya ang gibantog mang relihiyoso. Apan ako nakapangutana kun nganong ang uban namong kaubanan sa buhat nga unta mga tapulan man ug mga walay hinungdan ang kanunay ra man gyud nga mabulahan? Dinhi ra ko nakatugkad nga ang kinabuhi dili gyud mahimong pagatawgon nga usa ka patas nga pakigbisog. Adunay gilupigan ug adunay manglupig.

Usa ka adlaw niana samtang hapit na nako ipiyong ang mga mata ning katapusang mga gutlo sa akong pagpinal akong nabati sa radyo nga ang maong kompaniya nga akong gialagaran ang migasto og minilyon ka pesos aron pasidunggan ang apohan ni Mr. Kumkom nga sama kaniya ang magpunay lang og ngisi samtang gisud-ong ang mga lumilihok nga nag-antos sa hilabihang kapaitan. Binitbit ang tumang kahiubos ug kasilag ako nibiya sa sulad sa mga malupigon. Salamat sa kamatayon nga nahimong bugtong langit ug katapusan sa tanan kong mga pag-antos...Angay silang maglipay kay kasaulogan man.

Pamalandongi Kini:

Daghan kanato ang hapit na lang mangamatay apan wala pa gyud makasugod pagpakabuhi.