Go, girl!

Mao ni ang sagad nga reaksyon sa mga Pinoy nga nakakita sa aksyon nga video sa pagsumbag ni Davao City Mayor Sara Duterte sa sheriff nga si Abe Andres. Nagbaha ang suporta nga nadawat sa mayora sa Davao gikan sa social networking sites human ang kontrobersyal nga pag-atubangay sa mayor ug kawani sa korte nga nagbitbit sa mando sa korte nga ipaguba ang mga balay. Ang suporta sa tawo ngadto sa mayor sukwahi sa tubag sa Commission on Human Rights nga nag-ingon nga dakong sayop ang pagsumbag sa mayor sa usa ka kawani sa korte. Gibarugan sa CHR nga di’ makatawhanon ang pagpasakit sa ubang tawo labi pa sa usa ka gipili nga opisyal sa gobyerno.

Apan di’ lang dinhi sa nasud gisaw-an ang kontrobersyal nga video tungod kay nahimo ning sumsoman sa mga Pinoy sa kalibutan. Ang pagsuporta sa mga tawo sa gihimo sa mayor usa ka salabtunon nga simpatiya sa usa ka nasud nga dugay nang nisinggit og hustisya.   Di’ mahimong mabasol ang nagbaha nga pagdayeg kang Inday Sara tungod kay su’d nga higayon, nakakita ang mga tawo og usa ka opisyal sa gobyerno nga nibukbok sa usa ka tawo nga nagpatuman sa demolisyon nga maoy mopapas sa pinuy-an sa mga kabus ug mobutang nila sa wa’y kasigurohan nga pagpuyo.   Ang nahitabo sa Davao nga pagpangguba sa mga balay, nahitabo usab sa Sugbo ug ubang bahin sa nasud. ang naka-lahi sa Davao adunay mayor nga nitumaw nga mas isog pa sa pwersa nga nipatuman sa demolisyon.

Apan unsa bay makatarunganon ug dili ning maong isyu? Makatarunganon nga papahawaon ang mga tawo sa usa ka yuta nga gitukoran sa ilang mga balay bisan kun dili ila ang yuta. Apan di’ makatarunganon ang pagpapahawa sa mga tawo sa panahon nga kusog ang bunok sa uwan ug naghulga ang di’ maayong panahon sa Davao. Makatarunganon ang pagpatuman sa mando sa korte nga gub-on ang mga balay sa mga luna nga dili ilaha. Apan ang di’ makatarunganon mao ang wa’ pagpaminaw sa court sheriff sa hangyo sa mayor nga duha ka oras nga lugway aron istoryahon niya ang mga tawo nga mokalma ug sundon ang mando sa korte.

Makatarunganon ang kalagot sa usa ka opisyal sa gobyerno nga nagkapuliki sa pag-atiman sa gatusan ka mga tawo nga nabiktima sa pagbaha ug gihatagan og laing problema sa pag-demolish sa mga balay sa laing barangay. Ang dili makatarunganon mao ang pagsuntok niya sa sheriff ug pagmando sa iyang mga tawo nga hawiran ang kawani sa korte aron iyang labhan og kasaba. Makatarunganon nga molaban ang mga tawo ni Inday Sara ug mo-kwestyon ang CHR ug DILG sa gibuhat sa mayor. Ang dili makatarunganon kung kitang tanan di’ makapadayag sa atong mga opinyon kabahin sa usa ka kontrobersyal nga senaryo nga atong nakita sa telebisyon.

Makatarunganon ang pag-leave og lima ka adlaw ni Mayor Duterte aron dili mabahiran og politika ang himuon nga imbestigasyon sa mga taga city hall sa maong kontrobersya. Ang dili makatarunganon kung duphan sa amahan nga si Bise Mayor Rodrigo Duterte ang iyang anak niining isyu nga una nang gibarugan sa mayor nga tukma nga lakang. Makatarunganon nga imbestigahan ang maong kaso aron matugkad ang tinuod nga insidente ug masilotan ang si kinsa man ang angayan nga manubag. Ang di’ makatarunganon kung kalimtan lang ang kontrobersyal nga insidente ug ibutang nalang sa limot ang tanan uban sa pagbalhin sa sheriff sa laing lugar tungod sa iyang grabeng kahadlok sa mga Duterte. 

Daghan ‘ta og nakat-onan sa usa ka insidente sa Davao. Apan ang tataw nga leksyon mao nga sa matag desisyon sa korte, angayan lang mopatigbabaw ang tawhanon pagsabot labi pa sa mga kaso nga mahimo rang mahangyo nga di’ lang una ipatuman dayon tungod sa daghang konsiderasyon sama sa posibleng kagubot. Ang nahitabo sa Davao usa ka insidente nga buot himuon sa uban sa ilang mayor, apan nagpasalamat nalang ‘ta nga di’ sama ka pisikal ang atong mga opisyal. Apan sa nga’n sa tawhanong katungod ug konsiderasyon alang sa mga kabus, usa ko sa moingon og---go, girl!

Email: [email protected] or [email protected].