Sa pads alumni homecoming 2010

Gihimo ang usa ka mapalandungong pagpaambit sa mga kasinatian nila sa ministry ang usa sa mga pari sa Sugbo. Nindot ug tabunok sa kahulogan ang iyang gipamulong: “Diha pa ako nakaamgo sa dakong bili sa akong bokasyon sa dihang kini hapit na mawala kanako!” Tinuod dunay mga higayon nga ang usa ka relasyon, ang usa ka tawo ordinaryo na lang kaayo alang kanato. Diha na kita makaamgo nga mahinungdanon diay kini kun kini wala na.

Mao nga mahinungdanon gyud alang kanato nga sa bisan unsang matang sa relasyon kita ang mohimo ning mosunod:

A. Abli sa bisan unsang dangatan niini. Ang dili abli sa mga posibilidad ang maglisud pagdawat kun dunay kausaban.

B. Ang kaisog nga morisgo sa linugdangan sa maong pagpili. Ayaw himoa ang pagmahay ni ang pagbasol ni bisan kinsa. Walay laing mabasol kondili ang imo lang kaugalingon.

C. Nga bisan pa man kun unsay mahitabo ang tawo ug ikaw alang kaniya mahinungdanon ug bililhon gihapon.

Husto gyud ang awit sa Missing Felimon nga sine-sine. “Ang kinabuhi sugilanong hiwi, kalipay, kasakit ug kalami sila ang bida sa gugmang way katumanan. Mao nga husto si Pade nga dili gyud paabuton nga mawala ang giisip natong bililhon aron diha pa kita mag-amgo. Tiloka ang gutlo pre, kay basin ugma mobali na ang hangin sa giisip mong nindot ug limbationg kasinatian karon. Aron kun ugaling ikaw mohilak dili na kini usa ka dakong bakho ug minatay sa imong kapakyasan.