Problema sa baha

Ting-ulan na usab ug sama sa naandan kugi na usab kita dinhi sa Sugbo pagpangandan sa mga pagbaha. Hinuon normal na kining mga pagbaha ug mga pagdahili sa yuta nga mahitabo sa Sugbo panahon sa ting-ulan.

Gani nakasinati na kita og mga pagbaha sa niaging mga semana. Kini sa dihang usa ka oras nga kusog nga pag-ulan ang milunop sa nagkalain-laing lugar sa dakbayan sa Sugbo.

Nakalitan ang tanan sa grabe nga kakusog pagtubo sa tubig, ilabina didto sa downtown area. Ang maong paglunop grabe nga nakaapekto sa mga commuter ug mga motorista.       

Kalbaryo na kining maong sitwasyon matag ting-ulan. Ug grabe ang epekto niini sa mga katawhan kinsa walay laing mahimo kondili ang pag-ungad na lamang sa gibahaang mga kalsada aron dili matanggong.

Dugay na kining maong problema sa pagbaha apan wala gayuy klarong solusyon ang naimplementar sa kagamhanan sa dakbayan. Kutob lamang kini sa pahimangno sa publiko nga magmatngon matag ting-ulan.

Ang problema man gud mao nga kutob ra sa declogging sa mga kanal ug dredging sa mga creek ang paningkamot sa dakbayan. Apan basi sa atong eksperensiya kulang gayud kana sa pagpugong sa mga pagbaha.

Ang gikinahanglan sa siyudad mao ang konkretong aksiyon batok sa mga pagbaha. Ug unsa kini nga aksiyon? Kini mao ang pag-overhaul sa sistema sa drainage sa dakbayan.

Dili ikalimod sa kagamhanan ning dakbayan nga ang sistema sa drainage sa siyudad karaan na kaayo. Gani gamay lamang nga pagbaha, mosaka dayon ang tubig gumikan kay dili na makasugakod ang mga kanal ug uban pang mga waterways, ilabina didto sa downtown area.    

Tungod kay dili na maka-accommodate ang atong drainage sa nagsakang volume sa tubig nga modagayday gikan sa naupaw nang kabukiran, usa lamang ang solusyon nga akong nakita pagsulbad sa problema sa pagbaha sa dakbayan ug sa Metro Cebu sa kinatibuk-an.

Kini mao ang pagpadako sa karaan natong sistema sa drainage nga wala na gayuy silbi.

Sa una pa unta kini nga angay ipaimplementar. Apan ambot ngano, milabay na lamang ang pipila ka administrasyon apan wala gayud makahunahuna ang atong mga opisyal niini.  

Salikwaot kaayo nga paminawon nga highly urbanized tuod ang dakbayan sa Sugbo apan kulang kini sa modernong sistema sa drainage. Naapsan na hinuon kini sa ubang mga dagkong siyudad sa nasud kun ang drainage improvement na gani maoy hisgutan.

Kini unta ang unahon sa atong mga opisyal sa dakbayan dili ang ubang butang nga dili nagkinahanglang og dinaliang pagtagad. Angay nila nga unahon paghikutar ang masterplan alang sa implementasyon sa usa ka comprehensive drainage system sa siyudad.

Kay kun padayong pasagdan ug dili tagdon sa atong mga opisyal ang karaang mga kanal ug ubang mga agianan sa tubig, nan padayon usab kining problema sa mga pagbaha sa dakbayan panahon sa ting-ulan.

* * *

Email: [email protected].