Abusado nga mga draybers

Sa makausa pa, pahimangnoan na usab nako kadtong mga drayber nga abusado, ilabi na ang mga tag-iya og motorsiklo nga tuyoon g’yud nila nga dili butangan og side mirrors, dili magsul-ob helmet ug walay suga ang ilang motor. Mora na lang ug ani og “plaka nga guba” nga gabalik-balik pagpahinumdom, apan daghan gihapong mga drayber nga abusado. Unya bitaw kun madakpan, hapit na lang mohilak pagpangayo’g pasaylo.

Ang ubang drayber, gawas nga wala motuman sa lagda nga butangan og accessories ang ilang sakyanan, reckless kon danghag pa kaayo nga mopadagan diha sa karsada.

Sultihan ko lang kamo, ang mga law enforcers sa Land Transportation Office (LTO) dili gayud malooy nga mosakmit sa inyong mga lisensya. Huwata lang kun kamo madakpan.

Balikon nako pagpahibalo. Gidili ang pag-drive og bisan unsa nga “motor vehicles” nga walay side mirrors, walay suga ug ang plate numbers kinahanglan nga anha gayud ibutang sa luyo sa sakyanan, dili anha sa kilid. Aw kun daghan mo’g kwarta, na hala anha ibutang ang inyong plate numbers sa kilid sa inyong sakyanan aron nga kun madakpan kamo makabayad mo’g multa nga P578.

Pagka law-ay tan-awon sa mga motorsiklo nga magdagan nga kun magsunod ka wala kay makita nga plate numbers kay anaa kini gipapilit sa kilid, ang uban anaa pa gani dapit g’yud sa tumbanan.

Ang uban nga naghimo niini mga polis. Kay ngano, nagtoo ba kamo nga ang mga polis “exempted” sa pagpatuman sa balaud? Isip polis kamo gani unta maoy ehemplo sa pagsunod sa balaud.

Kamo usab nga mga confidential agents o mga assets sa kapolisan, midayeg ko nga kamo dunay tinguha nga motabang sa kagamhanan, apan ayaw pag-abuso.

Unya ra ba kun masakpan na kamo nga nakahimo’g kalapasan, kusug kaayo nga mogamit sa ngalan sa mga opisyal sa kapolisan nga kuno maoy nagkuha kanila isip assets.

Gahilas-hilas lang mo. Kun tinuod mo nga mga confidential agents, tipigi pag-ayo ang inyong mga identification cards aron dili kamo mahibaw-an, dili kay gamiton kini ninyo aron dili kamo dakpon.

 Kun wala kamo makasabut sa inyong katungdanan, palihug pangitaa si “Mr. Webster” ug pagpatabang sa dictionary aron ka masayud sa kahulogan sa pulong “confidential.”

Dunay mga drayber nga nadakpan sa LTO, nanghilak kay wala kuno sila’y kwarta nga ikalukat sa ilang lisensya. Nganong gapatuga-tuga ka man og lapas sa balaud nga wala ka man diay kwarta?

* * *

Uy, usa ka Antonio Dosado mikwestyon sa pag-hire sa LTO og mga civilian deputized agents, sama sa mga sakop sa Task Force Alpha. Buyno, kun nagtoo ka gani Mr. Dosado nga si LTO Chief Virginia Torres nakalapas sa balaud pag-deputized niya sa TFA aron motabang pagpanakop sa mga abusadong drayber, kwestyona ang iyang kamandoan sa hukmanan.

Si LTO-7 regional director Raul Aguilos igo lang nga gimandoan ni Secretary Torres nga ideputize ang TFA dinhi sa Central Visayas. Nagduda man ko nimo Mr. Dosado ba nga mireklamo ka kay gitangtang ka man sa pagka kawani sa LTO.

Kun mireklamo ka kabahin niini, niadto ra unta kini nimo gihimo dihang nagtrabaho ka pa sa LTO.

Unya, may hagit man ko nimo nga hatagi ko’g dukomento sa giingon nimong mga binuang diha sa LTO, wala pa man lagi. Kun tinuod nga may binuang diha hatagi ko’g dukomento.