Ayaw did-i si Mike uy

Kun dili gani imbitahon sa mga konsehal si Mayor Michael Rama aron mohatag sa iyang State of the City Address (SOCA) atul sa ilang inaugural session karong Hulyo 6, ngil-ad gayud kaayo tan-awon.

Alang kanako, laksot kaayo ang batasan sa mga sakop sa konseho sa dakbayan kun kini ilang himoon. Bisan og ibutang nato nga wala sa ilang lagda nga ang mayor mo-deliver gayud og mensahe sa ilang inaugural session, apan nahimo na kini nga tradisyon.

Abi kay mibuwag na si Mayor Rama gikan sa Bando Osmeña Pundok-Kauswagan (BOPK) rason na ba kini nga dili siya imbitahon aron mohatag sa iyang mensahe?

Kuhai ninyo og basihanan ang presidente sa nasud. Naandan na nga mohatag siya og State of the Nation Address (SONA) atol sa joint inaugural session sa Senado ug Kongreso.

* * *

Nag-ambahan didto sa City Hall kagahapon ang mga kabus nga lumulopyo nga nagpuyo sa yuta sa dakbayan diha sa North Reclamation Area (NRA) kay nakadawat kuno sila og notice of demolition gikan sa SPEED.

Wala mopasalig si Mayor Rama nga sila mapabilin gayud og dugay diha sa ilang nahimutangan. Ang pamahayag ni Rama nga kun wala lay moreklamo sa ilang pag-estar unya dili pa gamiton ang maong yuta, aw makapadayon sila pagpuyo diha.

Kun ako ang pangutan-on sa akong baruganan, dili maayo nga kining maong mga lumulopyo tugotan hangtud-sa-hangtud nga mopuyo diha kay prime lots na ang NRA.

Anugon kaayo ang maong luna nga ila rang puy-an. Kun maka-avail kamo og relocation site sa dakbayan mas labing maayo.

* * *

Pagsuwat nako niining maong lindog kagahapon sa hapon, nagdag-um na usab ang kalangitan ug mora’g miuwan na gani didto sa bukid.

Pastilan, abi ninyo gitungtong tawon nako daan ang akong motor og kahoy aron nga kun mahitabo pag-usab ang lunop diri sa among nahimutangan, dili na masanapan ang akong motorsiklo sa tubig-baha.

Sayonan ka nga atul sa kusog kaayong uwan ug lunop sa miaging semana, pwerteng daghana nga mga sakyanan nga nalunopan. Problema kaayo ilang mga tag-iya.

Diha’y tag-iya og sakyanan nga paghigawas g’yud niya sa dakung department store diri sa Colon, mora’g nakuyapan pagkakita niya sa iyang kotse nga giparking daplin sa karsada nga gisanapan na’s tubig.

Wala siya’y nahimo gawas sa paghilak. Angay g’yud lagi nga himoon dayon ang dinalian nga dredging kon pagpalawom sa sapa nga dia mag-agi ilawom sa Gaisano Main lahus na ngadto sa barangay Tinago.

Kining sapaa maoy magdala og bida kun mapalawman. Sigurado ko nga malikayan na ang paglunop diri sa downtown area kun mapalawman na kining maong sapa.

* * *

Hagiton nako si Antonio Dosado, kadtong mihimo og pasangil sa giingong binuang diha sa Land Transportation Office (LTO) nga suportahan niya ang iyang pasangil. 

Hatagi ko’g mga impormasyon sa mga binuang kun duna man, apan palihug suportahi og mga kamatuoran. Kun tinarong man gani kining kang Dosado, angay kining hangpon.

Makapangutana lang hinoon ko kun nganong karon ra man siya mireklamo. Nganong wala ka man moreklamo niini kaniadto dihang wala ka pa mawala sa trabaho sa LTO?

Nindot usab ang imong sugyot nga ang mga LTO emloyees angay usab nga ipa-drugtest aron sutaon kun dili ba sila mga tiggamitan og gidiling matang sa drugas.