Maayo unta og ang grabeng lunop nga nahitabo kagahapon sa hapon sa downtown area ning dakbayan sa Sugbo himuon nga basihanan ni Mayor Michael Rama mag-inisog na g’yud.
Palawman ang kasapaan nato dinhi sa dakbayan dili lang kay ang Mahiga Creek ang atimanon. Sa downtown area, ang sapa nga gikan sa Junquera nga moagi ilawom sa mga department stores, dayon sa D. Jakosalem ngadto na sa barangay Tinago maoy nakatampo sa lunop.
Dugangan pa sa tubig nga gikan sa ibabaw nga bahin sa barangay Kamagayan nga miagi na sa dalan D. Jakosalem, nakapasamot sa paglunop sa downtown.
Tiaw mo, ang akong motorsiklo nga gipabarug nako atubangan sa among opisina nga “elevated” man unta, giabut g’yud sa tubig. Taga tuhod ang giladmon sa tubig kun magbarug ka sa karsada D. Jakosalem.
Nakaingon lagi ko nga pagkanindot unta kun diha pa sa akong tupad si Mayor Michael Rama. Awhagon nako si Mayor Rama nga ipakita pa ang imong political will aron malikayan ang subli nga lunop.
Pastilan, wala pa gani’y kusog nga uwan kagahapon sa hapon apan naglunop. Unsa pa kaha no kun kusug ang pagbunok sa uwan? May mga opisyal kaha sa atong dakbayan nga nakakita sa lunop kagahapon?
Kun nakakita man sila, gibati kaha nila ang kauwaw?
* * *
Dugay na kaayong katuigan nga wala mapaladmi ang ubay-ubay’ng kasapaan dinhi sa dakbayan. Dunay pipila lang nga napaladman, sama sa kabahin sa Guadalupe River diha tungod sa Colon Bridge.
Dili man gani unta kini angay nga paladman kay bisan og mag-unsa og bunok ang uwan dili moawas ang tubig sa maong sapa kay lawom ang Guadalupe River.
Alang kanako, daku kaayong kauwawan sa mga opisyal sa dakbayan kining maong lunop nga nahitabo kagahapon ug maayo unta og dili lang ihilam-os sa mga opisyal sa City Hall ang kauwaw.
Kun gitagad pa nila kining maong problema, dili gayud nato masinati ang paglunop bisan og hinay ra kaayong uwan.
* * *
Sa padayong kinalit nga drug test sa mga driver sa public utility jeepney (PUJ) ug taxi kagahapon, laing duha ka drayber na usab ang na-positibo.
Pulos sila nangangkon nga migamit og drugas. Ang usa PUJ driver sa sakyanan nga nagbiyahe Danao-Cebu ug ang usa drayber sa RP-Corominas taxi.
Atensyon tag-iya sa RP-Corominas taxi. Gitug-anan ko sa imong drayber nga daghan man diay sila nga tigamitan og drugas. Nadani lang kuno siya nga mogamit sa shabu kay barkada lagi.
Mogamit kuno sila og shabu aron dili magduka nga magmaneho og sakyanan. Pait! Kuyaw kaayo kun ang atong kinabuhi isalig nato niining maong matang sa mga drayber kun mosakay kita sa ilang sakyanan.
Ang Land Transportation Office (LTO) mopaspas sa paghimo’g kinalit nga drug testing anha sa lainlaing mga dapit. Kadtong ma-positibo sa paggamit og gidiling matang sa drugas, sakmitan sa iyang lisensya.
Unya, may binuang usab nga among nasakpan kagahapon. Usa ka drayber nga walay lisensya mipresentar ug lisensya nga dili iya. Abi kaha og dili namo masakpan.
Tug-anan ko lang kamo nga kaming mga sakop sa LTO gitudloan unsaon pag-ila kun ang maong lisensya giisyu ba gayud kaninyo. Tiaw mo, hasta birthday sa maong tawo wala siya makahibawo?