Lungkab

Wala pa gani masulbad sa kapolisan ang unang kaso sa mga pagpanglungkab dinhi sa among parking area sa The Freeman, niadtong Sabado laing kaso napud sa lungkab ang nahitabo.

Niining higayona, ang service vehicle na gyud sa among kompaniya ang gilungkab sulod sa giabangan sa kompaniya nga luna isip parking area atbang sa The Freeman ug Star building.

Klarong nahigam ang kriminal nga responsable niini tungod kay sa unang mga kaso nga iyang gihimo nagpabilin man siyang gawasnon hangtud ron. Labihang pasalamat sa manlungkabay sa ka-inutil sa mga polis nga sakop sa Waterfront Police Station nga hangtud karon wala pa siya madakpi ug nagpadayon pa sa iyang pagpangawat.

Ambot pila pa kaha ka mga sakyanan ang sunod niyang malungkab usa siya madakpan? Ambot kinsay paabuton sa mga sakop sa Waterfront Police Station nga mamahimong sunod nga biktima usa nila madakpan ang responsabli niini?

Nasayod ko nga nahibawo ang atong kapolisan kinsay mga manlungkabay og sakyanan nga naglihok diha sa ilang area of jurisdiction busa way rason nga dili nila kini masulbad.

Mag-agad lang gyud ni sa kakugi nila pag-follow-up sa kaso. Ngano man lagi kun inila ug impluwensiyado ang mabiktima nga tulin pa man sa alas kwatro nila nga masulbad?

* * *

Gihunong na sa Department of Justice ang paghatag og siguridad ngadto sa lima ka mga tistigo batok ni PBMA supreme master Ruben Ecleo, Jr. tungod kay matud pa wa nay hulga sa ilang kinabuhi.

Bugtong si Josebil Bacolod nalang ang nagpabilin pa hangtud karon sa witness protection program sa DOJ sanglit wala pa man siya mahuman sa iyang testimoniya atubangan sa korte.

Human unya sa iyang pag-atubang sa korte, sama sa ubang mga saksi, gipaabot nga buhian pud siya sa DOJ.

Wala ko kasabot sa pamaagi sa DOJ paghatag og siguridad sa ilang mga tistigo. Human nila gamita ang tawo ug gibutang ang kinabuhi sa piligro pinaagi sa pagtistigo, human sa kaso ilang biyaan nga mag-inusara.

Kinsa may nag-ingon nga wa nay hulga sa ilang kinabuhi? Patay naba ang akusado nga dili na makahimo og kadaut ngadto nila? Nalimot si Secretary Leila De Lima sa kagahom ug impluwensiya ni Ecleo.

Kun nakalimot si De Lima, basin wa siya magsunod sa kaso, ako siyang pahinumduman sa ka brutal pagpatay sa mga membro sa pamilyang Bacolod labi pa sa ilang mga ginikanan.

Kinsa may responsabli niadto? Bisan wala gyuy diriktang ebidensiya nga naglambigit kang Ecleo apan ang mihimo sa krimin nasuta nga membro sa PBMA. Dihang gidakop si Ecleo didto sa Dinagat, pila man ka kinabuhi ang nakalas?

* * *

[email protected]