Mga sugarol nag-away parte sa RH

Ang duwa sa mahjong diha sa usa ka neighborhood sa Lahug kalit lang nga naundang dihang nagkalalis ang duha sa mga manunuwa bahin sa kontrobersiyal nga RH Bill.

* * *

Gilabay sa usa ka mahjongero ang pipila ka mga pitsas diin naigo ang usa ka bata nga nagduwa-duwa duol sa mahjong table.

* * *

Nagkainit ug nagkainit ang panaglalis sa duha.Ug hapit na gyud kini misangpot sa sumbaganay apan nasanta sa mga tanod.

* * *

Suma pa sa usa ka mahjongero sa lain nga lamesa, ang duha ka sugarol naglalis bahin sa isyu (RH Bill) nga wa nila hisabti.

* * *

“Ang ilang gilalisan,” matud pa niining saksi sa panag-away, “dili ang mga probisyon sa balaudnon kundili ang author sa maong bill.”

* * *

Ang usa ka protagonista nagsige’g panaway sa kongresista nga maoy author sa RH Bill, matud pa sa Ear informer. Ug sayop pa kuno ang tawag niini sa first name sa maong kongresista nga iyang gisigihag saway.

* * *

Human nahusay ang kagubot, nangatawa ra ang mga sugarol ... “nangatawa ra usab ang duha ka misugod sa away gumikan sa ilang kabuang,” suma pa sa atong tinubdan.

* * *

TRIVIA -- Gud morning diha sa atong mga higala sa Liloan, lakip na ang mga kawani sa Liloan municipal hall. Salamat sa inyong nagpadayong suporta.