Mga nagkadaiyang matang sa kahadlok

B. KAHADLOK SA PAKIGLAMBIGIT/PAKIGRELASYON – Usa ka babaye ang akong gipangutana: “Miss, sa imong kaanyag ug sa imong ka-propesyonal nganong wala ka pa man makigminyo sa imong hinigugma karon nga gawas nga guwapo pud siya, propesyonal, nga sa akong tan-aw buotan man pud na siya?”

Siya mitubag: “Dili na lang nako pugson una padre kay dili ko buot nga mahisama sa akong mga ginikanan nga magbulag lang gihapon sa kaulahian.” Aduna siya’y punto ug ang maong punto dili na kinahanglang lalison kay iya man kining kasinatian.

Apan mao kini ang atong timan-an nga dili tanang relasyon ang moresulta gyud og kaungkagan. Tinuod adunay mga higayon nga sa pundok sa imong mga higala anaa gyud ang mobudhi maingon nga si Jesus ang gibudhian ni Judas Iscariote.

Apan kining matang sa kahadlok ang nakasentro sa kaugalingon lamang. Tungod sa maong kahadlok, ang ubang mga tawo ang makasulti na lang hinuon nga ikaw magpalahi o lain kaayo diha sa ilang panlantaw.

Tinuod adunay mga higayon nga ang tawo na-trauma sa mga kasinatian sa pakigrelasyon (higala man o hinigugma). Apan wala kini magpasabot og katapusan. Gikinahanglan nimo nga makapadayon, hinuon sa sunod maantigo pud unta ikaw nga magmatngon ug mamalandong aron mas mahimo pang mabulokon ang imong pakigrelasyon.