Pakauwaw sa kampiyon
Ambot unsay nasulod sa utok ni Kongresista Manny Pacquiao nga nangahas man siya sa pagpakigdebate sa tang-an ug banggiitang magbabalaud sama ni Kongresista Edcel Lagman.
Kun kabubot-on man niya ang pagbarug aron debatihon si Lagman, siguro gikan pa siya sa iyang paghinanok ug naalimungawan lang sa iyang gihimo. Kun gitukmod man siya sa mga tawong misakay ug migamit sa iyang popularidad angayang dili niya tugotan ang iyang kaugalingon nga pakauwawan sa mga tawo nga mapahimuslanon.
Kun nakakita mo sa gihimo ni Pacquiao sa miaging adlaw sigurado ko nga ikaw maoy mauwaw sa imong kaugalingon para niya. Isip usa ka Pilipino daw bation ka og kauwaw moangkon nga dunay kongresista ang Pilipinas nga sama niya.
Way lalis nga dakong dungog ang gihatag ni Pacquiao alang sa Pilipinas, apan kini kutob lang sa natad sa boxing. Angayan tingali nga dawaton nalang niya ang kamatuoran nga kutob ra siya niini ug dili siya haum sa debate didto sa kongreso.
Maayong makamao siya mobutang og limitasyon sa iyang kaugalingon aron dili siya mahimong kataw-anan.
Igo na tingali nga siya mipadayag sa iyang baruganan nga supak siya sa Reproductive Health Bill ug atong respitohan ang maong baruganan. Apan ang pagpakigdebate atubangan sa kongreso nga klaro kaayong nagtamod og script usa ka pagpakauwaw sa iyang kaugalingon.
Wala gani magkadimao bisan ang iyang pagbasa sa inandam nga mga pangutana nga klarong dili iyaha. Kun bisan sa pagbasa wala magkadimao unsa na gyud ang pagpangahas nga makiglantugi.
Kinsa may nagtukmod ni Pacquiao paghimo niini, hinaut nakonsensiya mo human sa inyong pagpakauwaw sa giilang kampiyon sa mga Pilipino.
* * *
Wala gyud ko masayop sa akong pagtahap dihang misibog sa iyang kaso ang laing biktima sa abusadong sinagop ni Talisay City Mayor Socrates Fernandez nga si Joavan.
Karon nahibaw-an na nga sama sa ubang mga biktima gawas nga gihatagan og kwarta gipasaligan sab ni og trabaho sa City Hall sa Talisay. Nahinumdom pa mo niadtong club house attendant didto sa Vista Grande Subdivision nga giingong gitiunan og pusil ni Joavan human madugay og hatag sa softdrinks nga iyang gipangayo? Empleyado na ron sa Talisay.
Kini klarong pagpahimulos sa iyang gahom, gihimong puhonan ni Mayor Fernandez ang dakbayan sa Talisay aron areglohon ang mga kaso sa iyang sinagop.
* * *
- Latest
- Trending
