Drugas sa prisohan

Sa miaging semana 125 ka pakete sa shabu ang nasakmit sa mga tinugyanan sa Cebu City Jail gikan sa selda sa mga piniriso atol sa ilang gihimong “operation greyhound.”

Dili ni unang higayon nga dunay mga illegal nga butang nga nakasulod sa prisohan taliwa sa kunohay hugot nga siguridad sa maong bilangguan. Nahinumdom ko nga kaniadto daghan ang mga bisita nga mangreklamo, labi pa ang mga babaye, tungod kay kinahanglan silang maghubo gawas nga kapkapan hastang pribadong bahin sa ilang lawas.

Ang maong hugot nga siguridad gisabot sa publiko, labi pa sa mga bisita tungod kay kabahin lagi sa paglikay nga dunay mga illegal nga makasulod sa prisohan.

Apan unsa mang hitaboa nga bisan sa hugot nga siguridad diha sa ganghaan sa bilangguan, duna may drugas ug mga hinagiban nga makasulod?

Ang kasaligan nakong tinubdan mitug-an nga mas sayon pa ang pagpalit og drugas sulod sa prisohan kay sa gawas sa bilangguan. Matud pa sa akong tinubdan nga ang drugas gibaligya sulod sa prisohan nga daw sama sa dulce sa tindahan.

Dili ko motuo nga way kalibutan ang mga gwardiya o ba kaha opisyal mismo sa City Jail sa maong illegal nga kalihukan. Kun nakasulod ang illegal nga drugas sa prisohan bisan sa hugot nga siguridad nga ilang gipatuman, usa ray buot ipasabot niini, dunay kunsabo nga gwardiya ug opisyal sa bilangguan.

Posible nga nagdawat og suborno ang mga gwardiya ug opisyal sa prisohan sa illegal nga negosyo o ba kaha sila mismo maoy nalambigit sa maong negosyo.

Kun tinuod nga inosente ang mga opisyal sa City Jail sa pagsulod sa drugas sa prisohan angayang relibohan ug imbistigahon ang mga gwardiya nga gidistino sa gate ug pagsusi sa tanang bisita nga mosulod sa bilangguan.

Kini tungod kay nagpasabot ni nga nagtanga sila sa ilang trabaho hinungdan nga dunay drugas nga nakasulod. Kun wala man sila magtanga sigurado nga nabayran ang maong mga gwardiya hinungdan nga gitugotan nga makasulod ang illegal nga mga butang.

Kun dili kahimo ang kadagkuan sa bilangguan, labi pa ang warden sa pagpa-imbistigar sa iyang mga sakop nga nadistino sa gate ug pagrikisa sa mga bisita, nagpasabot ni nga nahibawo siya sa maong kalihukan busa angayang ang kadagkuan sa Bureau of Jail Management and Penology maoy mohimo og lakang pagtangtang sa warden ug pagpasaka og kaso batok niya.

* * *

[email protected]