Pagbalik sa gigikanan

Usahay kadudahan karon kun nganong magminyo ang duha ka binuhat. Adunay nagminyo aron mabuhi ug mahaw-as sa kalisud nga pinansiyal. Adunay magminyo kay buot moeskapo sa responsibilidad sa pamilya. Adunay nagminyo kay namabdos na. Mao nga daghan ang sa kaulahian ang nakaamgo nga dili gyud diay sila alang sa kaminyoon busa, magbulag na lang. Nagbulag sila kay wala na sila makasabot sa ilang panagpuyo. Ang bana nibiya kay nay lain. Ang asawa nibiya kay dunay nakit-ang mas ambongan ug mas mahigugmaon pa kaysa iyang bana. Ang nahimong nadat-ogan sa trauma mao ang kabataan nga nakaamgo nga dili pud sila andam pa nga biyaan. Mao nga nahimo kining kabahin sa ilang kahadlok ug padayon ni nilang pagabitbiton hangtod na sa pagdako.

Ang Dios ingon nga sukaranan sa tanang kinabuhi ang sa kanunay nagauban kanato bisan pa man sa mga higayon nga kita gibiyaan ug giabandonar mismo sa atong kaugalingong mga ginikanan. Ang buhaton lang mao nga: Una, ang pagdawat nga nahitabo kini. Ikaduha, ang kinabuhi wala mohunong sa ilang pagtalikod. Ikadulo, adunay Dios nga padayong nahigugma kanato pinaagi sa mga tawo nga andam mohulip sa gugmang gihikaw kanato.