Maghinulsol dili magbakasyon

Naghuot na ang mga pantalan, tugpahanan ug terminals bisan asang dapit sa nasud tungod sa kadaghang pasahero nga mamauli sa tagsa-tagsa nila ka mga probinsiya ug sa mga gustong magbakasyon sa mga dapit bakasyonanan. Pero kun atong ibasi sa mga balita mas daghan gyod ang mga pasahero nga magbakasyon kay sa mamauli sa ilang probinsiya aron adto sauloga ang Semana Santa.

Kasagaran nga padulngan sa mga bakasyonista nga maglulinghayaw mao ang mga maanindot nga mga beach resort dinhi sa nasud. Sigun sa akong nakita ug naobserbahan ang Semana Santa gihimo na sa uban nga adlaw sa bakasyon ug dili na adlaw sa paghinulsol sa mga kasal-anang ilang nahimo.

Tungod niini ang atong simbahang Katoliko murag naalarma na usab sa ilang nakita ug naobserbahan sa mga tawong nagpunsisok sa mga beach resorts ug ubang dapit bakasyonanan tungod kay inay adto kining mga tawhana sa simbahan anaa man hinoon kini sa mga dapit kalingawan ug pahulayanan.

Ang Semana Santa mao ang semana sa matag tuig nga gigahin sa atong simbahang Katoliko alang sa paghinulsol ug pagpamalandong sa mga kasal-anan nga atong nahimo ngadto sa atong gituohang Ginoo. Ang Semana Santa dili semana sa pagbakasyon kun dili semana kini sa paghinulsol ug pagpamalandong mao ganing gitawag kini og Semana Santa. Pero ambot ug unsa bay hinungdan nga murag ang nasilsil karon sa alimpatakan sa ubang katawhan bakasyon man ang Semana Santa. Dili ba kaha ni tungod sa medya hype?

Hinoon wa upod ta masayod kun ang mga tawong nagbakasyon ug naglingaw-lingaw sa mga beach resorts ug dapit bakasyonanan ning panahon sa Semana Santa mga Katoliko ba. Basin diay upod og lain ang ilang tinuohan. Basin dili sila mga Katoliko maong wa sila mosunod sa atong mga kalihokan.