EDITORYAL - Ang pagbahig sa basura

Nagkaguliyang ang kabarangayan sa dakbayan sa Sugbo bahin sa suliran pagpanghinlo sa palibot.

Ambot naunsa na ba kining pagkabutanganaha nga ang pagpanghinlo usa man unta kini ka butang nga dili na angayan pang hatagan og dakong panahon sa kagamhanan sa pagpangugat aron pag-awhag sa katilingban nga motuman niini.

Ang pagpanghinlo, katungdanan nga maisip nga kadungan sa pagkahimugso sa usa ka bata gikan sa sabakan sa iyang inahan, nga daan nang bahin sa iyang kinabuhi ug sa iyang personalidad ang katungdanang pagpanghinlo.

Hinuon tinuod nga ang sugyot nga “garbage segregation” mugna sa mga utok sa atong mga magbabalaod ning modernong panahon kinsa nakapaniid nga daghan ang kaantigo sa pagpanghinlo sa ilang palibot apan, wala bahiga ang ilang mga basura kay wala man usab nila hiandi.

Ang naandan nilang kinaiya mao ang yano nga pagpanghinlo sa palibot ug paghipos sa mga sagbot, pagdaob niini o kaha sa pagtapok niini ngadto sa basurahan.

Apan samtang nag-anam og saka ang gidaghanon sa katawhan, nag-anam na usab kadaghan ang basura, ug ang paturagas lang nga paghipos niini nga wala lain-laina ang malata ug di malata naghatag og labad sa ulo sa kagamhanan , busa gikinahanglan ang reporma ug ang bag-ong balaod bahin sa maayong sistema sa paghipos sa basura.

Apan karong anaa na ang balaod, unsa kagahi motuman ug mosunod sa mga tawo nga nabag-ohan sa maong paagi.

Dinhi masukod ang normal nga kinaiya sa usa ka molupyo, kun sa usa ka simpli kaayong butang o balaod gahi siyang patumanon, daw unsa pa kaha sa mga bug-at nga balaod, kaantigo ba kaha siyang motuman?

Di ba makauuwaw kaayo sa bahin sa usa ka panimalay kansang mga ginikanan ug mga anak inila ug halangdon sa katilingban apan sa pagbahig ug paglabay sa basura , di motuman, halangdon pa ba sila? Di ba?