Ang demokrasya sa balay lungsod

Gireklamo sa mga konsehal sa dakbayan sa Sugbo si Mayor Michael Rama tungod kay wa sila konsultaha sa pag-apil niini sa Metro Cebu Development Coordination Board kaniadtong Abril 1 ning tuiga.

Dili lang kini ang unang higayon nga mipadayag sa ilang gibati ang mga konsehal ngadto sa gipanghimo ni Mayor Michael Rama. Gani aduna pay mga higayon nga ilang gibaliwala ug gipadaplin ang kagustohan sa mayor sama sa duha ka milyon ka pesos nga gipangayo sa mayor alang sa iyang pagatukoron nga banda. Hinoon nakabawos upod ang Mayor tungod kay iya usab nga gisalindot ang laraw sa bise mayor nga mopalit sa mga gubaong eroplano para sa rescue operation.   

Kining tanan wa nato masinati ug makita sa panahon ni Mayor Tomas Osmeña. Wa tay makadungog sa mga konsehal nga nagsupak-supak ni Mayor Tomas Osmeña. Bisan ek na lang wa gyod tay madungog nila. May panahon man tood nga misuki si Bise Mayor Michael Rama kaniadto ni Mayor Tomas Osmeña pero inig tingog sa mayor modayon ra siya og hilom. Pero karon lahi na. Makapadayag na sa ilang sentimento ang si bisan kinsang opisyal sa balay lungsod sa dakbayan sa Sugbo.

Sa laktod nga pagkasulti may demokrasya na sa balay lungsod ug kini usa ka timailhan sa maayong pangatungdanan. Sa demokrasya gikinahanglan ang fiscalizer aron balanse ang dagan sa kagamhanan ug malikayan ang mga hiwi nga binuhatan nga makabutang sa katawhan sa disbintaha.

Hinuon kadto lamang constructive criticism ang atong gipaabot ug dili kadtong mga obstructionist tungod kay ang naulahi babag sa paglambo ug sa mga kaayohan nga angayang kapahimuslan sa tanan.

* * *

Maayong pagbasa diay ning atong lindog ug ning maong pamantalaan nila ni paring Joram Alatraca, Ms. Fely Sario, Monet Tan, Jiji Abella, Ann Aledon ug Mam Libeth Basergo. Ako upod diay nga pahalipayan ang akong Grade IV nga kaluha nga si Hannah Marie nga na-Most deligent ug si Hennah Marie nga na-most responsible. Pahalipayan upod nako si Ma. Honey Vive nga mogradwar sa elementarya ugmang adlawa ug sa iyang pagka Most Cooperative