Duha ka OFWs

Duha ka OFW gikan sa Qatar ang akong nahinabi atol sa Kapamilya Mega Local Job Fair nga gipasiugdahan sa Kagamhanan sa Dakbayan sa Sugbo sa Abellana National School Gym. Managlahi ang sirkumstansiya sa ilang pagpauli: Ang una nahuman nang kontrata niadtong Agosto apan naglisod na pagbalik sa gawas tungod sa kaguliyang sa mga nasud sa Middle East ug North Africa; samtang ang ikaduha nibiya tungod sa kabalaka nga ang mga protesta sa Qatar mosangpot sab sa kagubot ug di na ganahang mobalik tungod sa daotang taras sa iyang employer. Pulos sila nabawo kay pulos lokal nga bakanteng trabaho ray maaplayan. Matud nila di gyud paigo ang lokal nga suholan, gawas nga di na madawat tungod sa ilang pangedaron.

* * *

Nga maoy angay’ng tutokan ni Presidente Noynoy Aquino sa di pa siya mangambisyon paghunong na pag-export sa atong mga mamumuo ngadto sa nagkalainlaing kanasuran ug pagmugna og dugang kahigayonan sa trabaho aron nga anhi na lang manginabuhi sa ilang kaugalingong nataran uban sa ilang mga pamilya.

Ang tunglo sa gagmay natong suholan di masulbad kun padayon ning itugyan ngadto sa regional wage boards nga gidominahan sa nagkonsabong mga opisyal sa gobyerno ug mga negosyante. Ug angayang did-an sa balaod ang pangabuso sa local employers nga ang ilang dawaton sa bisan unsang posisyon mao rang mga guwapo, guwapa ug batan-on.

* * *

Angay sang lahugayon ni Aquino ang Commission on Higher Education (Ched). Nga nahimong babag, inay tigpasiugda, sa kausaban sa mga kurso sa mga kolehiyo ug unibersidad nga di na haom sa paspas nga kausaban sa panahon. Pribadong mga tulonghaan nireklamo nga siyam-siyam una sila sa di pang kahimo og bisan gamay lang kausaban sa ilang mga kurso. Salamat sa burukrasya sa Ched nga determinadong nitanggong sa atong sistema sa edukasyon sa langob sa karaang panahon nga wa pay Facebook ug Twitter.

Kun Ched ang paundayonan, padayong mag-usik-usik og kuwarta ang mga ginikanan pagpa-eskuyla sa ilang mga bata, nga mag-usik-usik sa ilang panahon, kay ang ilang mga kurso wa mohaom sa panginahanglan sa mga industriya.

* * *

Ang unang OFW naglingulingo nga nagtan-aw sa kaliboan ka bakante nga nagkinahanglan og mga aplikante nga di molapas sa 25 anyos. Naglisod pagsabot nganong ang ubang kanasuran modawat bisan kapin sa 50. 41 anyos na siya. Mosurender na unta dihang nakatsamba og trabaho nga modawat og 45 anyos.

Huwes sa Qatar ang employer sa ikaduhang OFW. Apan ang asawa namasangil nilang Pinay nga domestic helpers mga hugawan, tapolan ug kawatan. Di na siya mobalik nila. Apan wa gani siya magtagad pagsusi may maaplayan ba dinhi. Matud niya mabuhi lang ang iyang pamilya kun manrabaho siya sa mga langyaw—bahala na kun pipila nila wa moila sa iyang kaligdong.

* * *

Email: [email protected].