EDITORYAL - Mga magbabalaod respetohan

Girespetohan nato ang magkalahing desisyon sa atong mga magbabalaod nga Sugboanon bahin sa isyung impeachment kang Ombudsman Merceditas Gutierrez.

Sila ang labing nasayud sa ilang tagsatagsa ka baroganan ug tukmang sitwasyon didto sa kongreso.

Ang publiko , mga tigpaniid lang, di maayo nga husgahan nato nga sayop ang mga miboto og “No” pagpa-impeach kang Gutierrez o kaha sayop ang mibuto og “Yes” sa maong isyu.

Hinuon ang pagpatigbabaw sa gitawag nga “due process” maoy barahan sa maong isyu aron makatarunganon nga kinahanglang husgahan si Gutierrez pinaagi sa paglusad og imbistigasyon.

Diha sa mga pagsukitsukit nga mabati sa kadaghanan, masayran sa tanan kun may sala ba si Gutierrez o wala.

Ang nakapait kung husgahan siya nga may sala , apan di pinaagi sa tukmang proseso sa imbistigasyon, mahimo siyang hinikawan sa due process nga di maayong paminawon sa iyang kaugalingon ug sa iyang mga supporter kay matawag nga usa ka panamastamas sa iyang katungod.

Kay sa impeachment, wala magkahulogan nga positibo siya sa kasal-anang gihan-ok kaniya, apan sa laing bahin ang maong imbistigasyon maoy magpagawas sa iyang lunsay nga kalimpiyo kun ugaling wala gayud siyay kasalanan.

Kay sa di siya paatubangon sa imbistigasyon diin magpabilin ang dag-om sa mga katahap nga siya nakabuhat og bug-at nga kalapasan tungod sa mga salaod nga gihan-ok kaniya.  

Kun ugaling mahukman siyang sad-an, aw di man usab siya angay maguol kay ang silot mao ra man an g pagpapahuway kaniya sa katungdanan, ug ang maong kapalaran anha naman usab siya padong kay moritero naman siya sa sunod tuig. Di ba?