Kamingawan

Kining dapita ang gituohan nga pinuy-anan sa mga Espiritu. Mao nga dili ikatingala kun nganong si Jesus ang gitental ning dapita. Gisulayan kun mapamatud-an ba gyud niya ang estado ingon nga Anak sa Buhing Dios. Kun mapamatud-an ba gyud niya nga angayan ba siyang pagatawgon nga gikahimut-ang Anak sa Dios. Apan atong nakita nga si Jesus ang nagpabiling matinud-anon hangtud sa katapusan. Walay nahimo ang yawa diha sa iyang mga paglingla bisan pa man kun mogamit pa siya og mga Bersikulo sa Bibliya.

Ang kasinatian ni Jesus, kasinatian usab natong mga tawo. Mao nga siya nakasabot gayud sa kahimtang sa mga tawo sanglit, gitental man siya sa tanang paagi. Buot sa yawa nga mawala siya sa iyang tumong. Mao nga gipaningkamotan niya nga iyang ihanyag ang bisan unsang maisip natong shortcut. Apan gumikan sa dakong pagtamod sa Langitnong Amahan, wala panumbalinga ni Jesus ang shortcut hinunoa miuyon siya nga moagi gyud sa proseso sanglit ang kinabuhi usa man ka proseso maingon nga ang panaw sa pagtuo usa pud ka proseso.

Sala ba gud ang tentasyon? Ang tubag dili! Hinuon, kahigayonan sa pagpakasala kun ugaling dili hamtong ang tawo sa paggamit sa kagawasan nga gihatag kaniya sa Dios. Ang tentasyon sa kanunay ang masinati gyud sa mga tawo. Kabahin kini sa atong kinabuhi ingon man kabahin sa atong pagkab-ot sa Balaanong Tinguha. Kay matud pa ni Thomas ‘a Kempis. “No man is so perfect and holy as not to have sometimes temptations; and we cannot be wholly without them!”