EDITORYAL - Ang panarbaho sa gawas

Ang nahitabo karong kahasol sa mga mamumuong Pilipino nga tua sa Middle East usa ka dakong leksyon sa mga Pilipino nga angay hinuktokan sa tanan.

Apan maayo nalang kay may mga nasud pang kadangpan nato aron ta manginabuhi.

Pagka-anindot sa atong nasud, ug daghan kaayong mga milyonaryo dinhi, ug gani paborito kaayo kining suroyan sa daghang mga langyaw.

Ang Pilipinas gituyo pag-umol sa Ginoo nga lahi sa ubang nasud gumikan sa balansi nga lakaw sa panahon niini, may tukmang kainit sa adlaw, may tukmang gidaghanon sa uwan, may mga bagyo apan walay yelo ug uban pang bahanding natural nga ania sa nasud.

Maayong pagka-plano sa Ginoo ang paghimugso sa Pilipinas, maoy hinungdan nga daghan kaayong ganahan nga mga langyaw nga anhi mopuyo dinhi.

Apan sa kaanindot sa atong nasud, pipila lang ang milyonaryo niini, sa 94 milyones nga populasyon, naglabi niini ang mga kabus.

Sa umaabot nga katuigan mosaka na ang populasyon ngadto sa 100 milyones , 200 milyones ug hangtod asa kaha kutob nga may mga nasud pa sa kalibotan nga mopatrabaho sa mga Pilipino.

Sa mga nasaksihan karon sa mga nanarbaho didto sa gawas, bisan naglatay na sa lugas sa lanot ang ilang kinabuhi, apan kun mahimo adto na sila hiabti sa ilang kamatayon didto kay sa anhi sa Pilipinas nga magkutoy ang ilang tiyan sa kagutom.

Kun ang kakabus nasinatian karon sa kadaghanan niining 94 milyones pa lang ang atong populasyon, unsa na kaha kun moabot na ta og 200 milyones.

Sa pagkakaron walay laing malantaw sa tawo  kundi moeskuyla aron manarbaho didto sa gawas, kun way suwerte, magnegosyo nalang, ug kun dimalason sa negosyo, aw basta mangita gyud og paagi nga mabuhi.

Ang mga babaye duyogan na sa mga ginikanan sa pagpangita og mga langyaw nga mabana nila, sa paglaum nga mga langyaw lamang ang makasalbar sa ilang kalisod sa pagpuyo.

Hinuon sa pipila nga gisuwerte dinhi tungod sa maayong negosyo ug sa dagko kaayong suweldo sa mga buhatang pribado ug sa gobyerno, wala kini maghunahuna og problema.

Hayahay kaayo kun mahisama sa mga na-milyonaryong opisyal sa militar, mao pay pag-ingnon, ‘hayahay pa sa polis’. Di ba?