Pulos bulilyaso

Sa ikaduhang sunudsunod nga higayon, nasipyat ang atong mga buhatan sa gobyerno sa pagdakop sa mga langyaw nga gipasanginlan nga nakahimo og krimen: Una, nanglipaghong sa kauwaw ang atong kapolisan ug Bureau of Immigration sa sayop nilang pagdakop sa Norwegian national nga si Sven Erik Berger ug ang Sugbuanon niyang hinigugma, si Karen Esdrelon, sa pagdagit ug pagpatay ni Ellah Joy Pique; ug ikaduha, ang PDEA ug Bureau of Customs nasayop sa ilang pagpasangil nga nipayuhot og pseudo ephedrine ang Chinese nationals nga silang Iek Wan Wong ug Xiuyu Hunan Tan.

 Ang bugtong kalainan mao nga sa kaso ni Pique nahinayak pagkiha ang kapolisan ug natanggong sa kapin sa semana silang Berger ug Esdrelon; samtang sa ikaduhang kaso, nigawas dayon ang resulta sa laboratory test nga nihimakak nga ilegal nga drugas ang nasakmit gikan sa Chinese nationals.

* * *

Sa duha ka kaso, managsama nga niinsistir ang mga buhatan sa kagamhanan nga wa silay mga balaod nga nalapas kay igo lang gituman ang ilang katungdanan: Sa kaso ni Pique, nitakdo ang police sketch sa mga panagway nilang Berger ug Esdrelon ug gitudlo sila sa mga bata nga saksi; samtang sa ikaduhang kaso, giyak-an sa mga iro sa PDEA ang bagahe nilang Wong ug Tan ug gidasonan sa chemist nga ephedrine ang nasakmit gikan nila.

Apan sa unang kaso, napakyas ang kapolisan pagsusi sa mga dapit nga giadtoan nilang Berger ug Esdrelon sa mga takna sa pagdagit ni Pique ug duna pay pasangil nga gilubag sa dakong opisyal ang pamalibad sa mga batang saksi. Ug sa ikaduhang kaso, gipasanginlan ang chemist nga nagpataka pag-ila sa ephedrine bisan di tukma ang bulok nga iyang nakita.

* * *

Niinsistir si Regional Director Adrian Alvariño sa Philippine Drug Enforcement Agency (PDEA) nga di sila mangayo og pasaylo nilang Wong ug Tan kay wa malapas ang ilang katungod (kay duna silay laing kaso tungod sa kapakyas pagpahibawo sa Customs sa ilang bawon nga $20,000).

Gibasol sab ni Alvariño ang kakuwang sa ilang mga iro. Matud niya nasobrahan ra ang trabaho sa duha nila ka iro mao nga posibleng nangyaka ang mga iro sa bagahe nilang Wong ug Tan tungod sa kakapoy. Gibasol sab niya ang kadaghan sa nagkalainlaing baho ug kasaba sa mga pasahero ug mga makina sa Mactan Cebu International Airport nga posibleng maoy nakapalibog sa mga iro.

* * *

Daghang nabalaka sa daotang mga implikasyon ning sunudsunod nga mga bulilyaso. Di lang sa turismo, sa kaso ni Berger, kun dili ug labi na sa tandugon nga relasyon tali sa Pilipinas ug China sa kaso nilang Wong ug Tan.

 Hinaot nga way labot sa kaso ang paghasi sa barko sa China sa mga Pinoy nga naghimo og seismic research sa giilogan nga Spratlys.

* * *

Email: [email protected]