Unsay laraw sa China sa Pilipinas?

Miyerkules sa miaging semana 8.5 ka kilo nga shabu nga nagkantidad og 42.5 milyones ka pesos ang nasakmit sa atong kapolisan gikan sa mga Tsino didto sa Parañaque. Sa follow-up operation nga gihimo sa kapolisan ilang nasakmit ang 190 ka kilo nga shabu nga nagkantidad og (1) usa ka bilyon ka pesos sa usa ka apartment nga giabangan sa mga Tsino didto sa San Juan sa kaulohan.

Ang maong gidaghanon sa shabu nga nasakmit sa atong mga police mao ang ikaduha sa 500 ka kilo nga shabu nga nasakmit gikan ni Mayor Ronnie Mitra didto sa Quezon province kaniadtong tuig 2009.

Ang sunod-sunod nga pagkasakmit sa maong gidaghanon sa ginadiling drugas nga mikantidad og 1.769 ka bilyon ka pesos ug misakoti sa siyam (9) ka mga Tsino kabahin lamang sa gilusad nga "operation meltdown" sa kapolisan sa National Capital Region nga ilang gisugdan sa miaging buwan. Sa imbestigasyon nga gihimo, usa sa mga nadakpan nga Tsino mitug-an nga gikan sa China ang supply nilang shabu. Pipila ka tuig ang nakalabay gihimo usab sa mga Tsino ang pinakadakong shabu laboratory sa may dakbayan sa Mandaue dinhi sa Sugbo.

Unsa may buot ipasabot niini? Gihinay-hinayan ba kita pagpatay sa mga Tsino gamit ang makaadik nga shabu ug uban pang matang sa ginadiling drugas?

Ang China nasayran sa ka strikto sa ginadiling drugas gani kamatayon gayod ang ilang silot sa mga magpalusot niini. Apan nganong sayon raman nga nakalusot sa ilang nasud ang binilyon ka pesos nga kantidad sa drugas paingon dinhi sa Pilipinas? Sa pagka karon adunay 200 kapin ka mga Pinoy nga nag atubang og kaso sa pagpayuhot og ginadiling drugas didto sa China. Ang uban kanila napahamtangan na og silot samtang ang tulo gikatakda na untang patyon. Sa ilang pagsulod sa China dali ra silang nadakpan tungod sa kaabtik sa mga otoridad sa China nga nagbantay sa ipalusot nga ginadiling drugas apan ang maong mga otoridad wa makadakop sa ilang mga tawo nga mipagawas og ginadiling drugas sa ilang nasud ug gitumod dinhi sa Pilipinas. Gituyo ba kini sa mga Tsino o sulagma lamang. Ambot lang! Ang mga Tsino lang ang nasayod.